އޯލެވެލް ނިންމުމަށްފަހު އޭލެވެލް ފުރިހަމަކުރާ ދަރިވަރުންގެ ނިސްބަތް 35 އިންސައްތަ އިތުރުވެފައިވާ ކަމަށް އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވެއްޖެއެވެ. މިކަން މިނިސްޓަރު ހާމަކުރެއްވީ މިރޭ ބޭއްވުނު “އަހާ” ފޯރަމްގެ ފަސްވަނަ ސެޝަންގައެވެ.
މިނިސްޓަރު ވިދާޅުވި ގޮތުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވިސްނުންފުޅުގައި ވަނީ ރާއްޖެ އުމްރާނީ އަދި ފިކުރީ ގޮތުން ތަރައްޤީކުރެއްވުމެވެ. މި މަޤްޞަދު ހާސިލުކުރެއްވުމަށް، ތަޢުލީމީ ދާއިރާގެ ފެންވަރު މަތިކުރައްވައި، ދަރިވަރުންނަށް ފަހި ފުރުސަތުތަކެއް ހޯއްދަވައިދެއްވުމަކީ އިސްކަންދެއްވާ ކަމެއް ކަމުގައި ވިދާޅުވިއެވެ.
ފާއިތުވި ދޮޅު އަހަރުގެ ތެރޭގައި، އެންމެ އިސްކަމެއް ދެވުނީ އޯލެވެލް ނިންމުމަށްފަހު މަގުމަތިވާ ދަރިވަރުންގެ އަދަދު މަދުކޮށް، އޭލެވެލް ކިޔަވާ ދަރިވަރުންގެ އަދަދު އިތުރުކުރުމަށެވެ. “މާލޭ ސަރަހައްދުގައި 76 އިންސައްތަ ދަރިވަރުންނަށް މިހާރު އޭލެވެލް ފުރުސަތު ލިބޭ މިންވަރަށް އެ ފުރުސަތު ފުޅާކުރެވިފައިވޭ،” މިނިސްޓަރު ވިދާޅުވިއެވެ.
އިތުރު އިސްލާހުތަކެއްގެ ގޮތުން، ޓީޗަރުންގެ ދުޅަހެޔޮކަން ކަށަވަރުކުރުމަށްޓަކައި ހުކުރު ދުވަހަކީ ޓީޗަރުންނަށް ފުރިހަމަ ބަންދު ދުވަހެއްގެ ގޮތުގައި ހަމަޖައްސާފައިވާ ކަމަށް މިނިސްޓަރު ހާމަކުރެއްވިއެވެ. އަދި ދިރާސީ އަހަރު ފެށުން ޖަނަވަރީ މަހަށް ބަދަލުކުރުމުގެ މަސައްކަތް ވެސް ނިމުމަކާ ހަމައަށް އަންނަމުންދާ ކަމަށް ވިދާޅުވިއެވެ.