ކުރީގެ ސަރުކާރުތަކާ ޚިލާފަށް މި ސަރުކާރުން މަސްތުވާތަކެތީގެ ވިޔަފާރިކުރާ ވިއުގަތަކުގެ އިސްވެރިން އަތުލައިގަތުމަށް އިސްކަންދޭ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.
ރައީސް އޮފީހާއި ޕަބްލިކް ސަރވިސް މީޑިޔާ ގުޅިގެން ކުރިއަށްގެންދާ ވަޒީރުންގެ "އަހާ" ފޯރަމްގައި ވާހަކަފުޅުދައްކަވަމުން ވަޒީރު ވިދާޅުވީ، ކުރީގެ ސަރުކާރުތަކުން މަސްތުވާތަކެތި ބޭނުންކުރާ މީހުންނާއި އެތަކެތި ފޯރުކޮށްދޭ މީހުންނަށް އަމާޒުކޮށް އޮޕަރޭޝަންތައް ހިންގުމުގެ ސަބަބުން އަސްލު މައްސަލައަށް ހައްލު ނުލިބޭ ކަމަށެވެ.
"މަސްތުވާތަކެތީގެ ވިއުގަތައް ހިންގާ ވެރިންނަށް އަމާޒުކޮށްގެން ޕައިލެޓް އޮޕަރޭޝަނެއް ހިންގާފައިވަނީ ފުވައްމުލަކުގައި. މި އޮޕަރޭޝަންގެ ތެރެއިން މަސްތުވާތަކެތީގެ ވިއުގަތައް ހިންގާ އެންމެ ބޮޑު 2 މީހުން ވަނީ ހައްޔަރުކޮށްފައި" ވަޒީރު ވިދާޅުވިއެވެ.
މި ދައުރުގެ ތެރޭގައި މަސްތުވާތަކެތީގެ މައްސަލައަށް ދާއިމީ ހައްލެއް ގެނެސްދެއްވާނެ ކަމަށް ވަޒީރު ވިދާޅުވިއެވެ. އަދި މި މަސައްކަތް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމުގެ ފުރަތަމަ ދުވަހުން ފެށިގެން ފައްޓަވާފައިވާ ކަމަށާއި، މައްސަލަ ހައްލުކުރުމަށް މަސައްކަތްކުރާ އިދާރާތައް އެއް މިނިސްޓްރީގެ ދަށަށް ގެނެސްފައިވާ ކަމަށްވެސް ވިދާޅުވިއެވެ.
މިނިސްޓަރު ހާމަކުރެއްވި ގޮތުގައި މިދިޔަ 18 މަސްދުވަހުގެ ތެރޭގައި 1.4 ބިލިއަން ރުފިޔާގެ މަގުމަތީ އަގުހުރި 700 ކިލޯގެ މަސްތުވާތަކެއްޗާއި 9,000 އަށްވުރެ ގިނަ ރާފުޅި އަތުލައިގަނެފައިވެއެވެ. އަދި ޕޯސްޓާއި ވައިގެ މަގުން މަސްތުވާތަކެތި އެތެރެވުން ހުއްޓުވުމަށް ޚާއްސަ މަސައްކަތްތަކެއް ކުރަމުންދާ ކަމަށާއި، ކަނޑުމަގުން އެތެރެވާ މަސްތުވާތަކެތި ހުއްޓުވުމަށް ކޮންޓެއިނާ ސްކޭނަރެއް ހޯދުމުގެ މަސައްކަތްވެސް ކުރަމުންދާ ކަމަށް ވިދާޅުވިއެވެ.