ނ. އަތޮޅުގައި ހިންގާ ރިސޯޓެއްގެ ނެރު ކައިރިން ފީނަން އުޅުނު ބައެއްގެ ތެރެއިން މީހެއްގެ ގައިމަތިން ލޯންޗެއް ގޮސް، އެ މީހާގެ އަތް ބުރިވެގެން ބޮޑެތި އަނިޔާތަކެއް ވެއްޖެއެވެ.
ފުލުހުން ބުނި ގޮތުގައި މި ހާދިސާ ހިނގައިގެން ފުލުހުންނަށް ރިޕޯޓްކޮށްފައި ވަނީ ރޭ 10:30 ގައެވެ. މި ހާދިސާގައި އަނިޔާވެފައި ވަނީ ބަންގްލަދޭޝްގެ 30 އަހަރުގެ ފިރިހެނަކަށެވެ.
ފުލުހުން ބުނި ގޮތުގައި، މި ހާދިސާގައި އެ މީހާގެ ކަނާތް އުޅަނބޮއްޓާއި ހަމައަށް ވަނީ ބުރިވެފައެވެ. އަދި އޭނާއަށް ލިބުނު އަނިޔާތަކުގެ ސަބަބުން އިތުރު ފަރުވާ ދިނުމަށްޓަކައި މާލެ ގެނެސް، މިވަގުތު އޭޑީކޭ ހޮސްޕިޓަލުގައި ފަރުވާ ދެމުންދާ ކަމަށްވެސް ފުލުހުން ވަނީ ބުނެފަ އެވެ.
މި ހާދިސާއާ ގުޅިގެން އިތުރު ތަފްސީލެއް މި ވަގުތު ލިބިފައެއް ނުވެއެވެ. އަދި މި ހާދިސާ ހިނގި ގޮތާ ގުޅޭގޮތުން ފުލުހުން ދަނީ ތަހުގީގު ކުރަމުންނެވެ.