ދިވެހި ޢާއިލާތައް ބަދަހިވެ، ފުދުންތެރިވެ، ދިރިއުޅުމުގެ ފަސޭހަތައް އިތުރުވީ ވަރަކަށް ޤައުމުގެ ކުރިއެރުން ހަލުވިވެ، ކުރިމަގު އުޖާލާ ވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މިއަދު ފާހަގަކުރަމުންދާ އާއިލާތަކުގެ ބައިނަލްއަގްވާމީ ދުވަހުގެ މުނާސަބަތުގައި ދިވެހި ޢާއިލާތަކަށް ފޮނުއްވި ތަހުނިޔާގެ މެސެޖުގައި ރައީސް ފާހަގަކުރެއްވި ގޮތުގައި އިސްލާމްދީން އެންމެ ބޮޑު އިސްކަމެއް ދެނީ އާއިލީ ގުޅުންތައް ހަރުދަނާ ކުރުމަށެވެ.
މީސްމީޑިއާގައި ކުރެއްވި ޕޯސްޓެއްގައި ރައީސް ވިދާޅުވެފައިވަނީ "ޢާއިލާތަކުގެ ބައިނަލްއަޤްވާމީ ދުވަހު، ދިވެހި ކޮންމެ ޢާއިލާއަކަށް އަޅުގަނޑު އެދެނީ ފަހިކަމާއި ފާގަތިކަމަށް" ކަމަށެވެ.
"ދިވެހި ކޮންމެ ޢާއިލާއަކަށް ފާގަތި ދުވަސްތަކެއް ހޯދައި ދިނުމުގައި މާތް ﷲ ނަޞްރާއި ކާމިޔާބީ މިންވަރު ކުރައްވާށި. އާމީން،" ރައީސް ޑރ މުއިއްޒު
ކޮންމެ އަހަރެއްގެ ވެސް މެއި މަހުގެ 15 ވަނަ ދުވަހަކީ ބައިނަލްއަގްވާމީ ގޮތުން ފާހަގަކުރާ އާއިލާތަކުގެ ދުވަހެވެ. މި ދުވަސް ދުނިޔޭގައި ރަސްމީކޮށް ފާހަގަކުރަން ފެށީ 1993 ވަނަ އަހަރު އދ. ގެ ފަރާތުންނެވެ.
އާއިލާތަކުގެ ދުވަސް ފާހަގަކުރަމުންދާއިރު، އާއިލާތަކުގެ ފުދުންތެރިކަމާއި ދުޅަހެޔޮކަން އިތުރުކުރުމަށް ސަރުކާރުން އަންނަނީ މުހިއްމު މަސައްކަތްތަކެއް ކުރަމުންނެވެ.