މާލޭ ހެންވޭރު ގެއެއްގެ މަތިން އަންހެނަކު ވެއްޓުނު ހާދިސާއާ ގުޅިގެން ފުލުހުން ހިންގާ ތަހުގީގަށް އެއްވެސް ނުފޫޒެއް ނުފޯރުވާ ކަމަށާއި، އޭރު ހުންނެވި ކޮމިޝަނަރ އޮފް ޕޮލިސްއަށް ފޯނުން ގުޅުއްވީ އެމަނިކުފާނު ދިރިއުޅުއްވާ ގެކޮޅު ބަލައިފާސްކުރުމަށް ކޯޓު އަމުރެއްގެ ބޭނުން ނުވާނެކަން ދެންނެވުމަށް ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެއެވެ.
21 އަހަރުގެ އަންހެން ޒުވާނާ އިމާރާތެއްގެ ފުރާޅުން ވެއްޓި، ސީރިއަސް ހާލަތެއްގައި ހޮސްޕިޓަލަށް ގެންދިޔަ ހާދިސާއާ ގުޅިގެން މިނިސްޓަރު އަމީންގެ މައްޗަށް އިދިކޮޅު މެންބަރުން ކުރި ތުހުމަތުތަކާ ގުޅިގެން، އެ މައްސަލައިގައި އޭނާގެ އިތުބާރު ނެތްކަމުގެ މައްސަލަ ހުށަހެޅި، މިއަދުގެ މަޖިލިސް ޖަލްސާއަށް ވަނީ ހާޒިރުކޮށްފައެވެ.
“މި މައްސަލައިގައި އެއްވެސް ކަމެއް ސިއްރުކޮށްފައި ނޯންނާނެ،” މިނިސްޓަރު އަމީން ވިދާޅުވިއެވެ. އަދި މި ހާދިސާ ހިނގިއިރު އެމަނިކުފާނު ހުންނެވީ ރާއްޖެއިން ބޭރުގައި ކަމަށާއި، ސިއްރުކުރަން މަސައްކަތް ކުރެއްވި ކަމެއް އެނގިވަޑައިގަންނަވާނަމަ ހާމަކޮށްދިނުމަށް އެދިވަޑައިގަތެވެ.
މިނިސްޓަރު އަމީން އިތުރަށް ވިދާޅުވި ގޮތުގައި، ކެބިނެޓުގެ މިނިސްޓަރެއްގެ ހައިސިއްޔަތުން ދައުލަތުގެ އިދާރާއަކަށް ފަސޭހަކޮށްދިނުމަކީ ޒިންމާއެއް ކަމަށް ގަބޫލުފުޅު ކުރައްވާތީ، އެމަނިކުފާނުގެ ގެކޮޅު ބަލައިފާސްކުރުމަށް ކޯޓު އަމުރެއް ބޭނުން ނުވާނެކަން ދެންނެވުމަށް ސީޕީއަށް ގުޅުއްވި ނަމަވެސް، ސީޕީ ފޯނަށް ޖަވާބުދެއްވާފައި ނުވާ ކަމަށް ވިދާޅުވިއެވެ.
އަދި މި މައްސަލައިގައި ތުހުމަތު ކުރެވޭ ފަރާތްތަކުގެ ތެރޭގައި އެމަނިކުފާނުގެ ބޮޑުބޭބެއެއް ހިމެނޭ ކަމަށް އިދިކޮޅު ފަރާތްތަކުން ފަތުރަމުންދާ ވާހަކަތަކަކީ ދޮގު ވާހަކަތަކެއް ކަމަށާއި، އާއިލީ މަސްލަހަތު ހިމެނޭ އެއްވެސް ކަމެއް ނުވަތަ ފަރާތެއް މި މައްސަލައިގައި ހިމެނޭ ކަމަށް ފުލުހުން ހާމަކޮށްފައި ނުވާ ކަމަށް ވަޒީރު ވަނީ ވިދާޅުވެފައެވެ.