ލޯކަލް ކައުންސިލްތަކުގެ ދައުރުގައި ބާކީ އޮތީ ދޮޅު އަހަރު ކަމުގައިވާނަމަ، އެ ގޮނޑި ހުސްވުމުން ބައި-އިލެކްޝަން ބާއްވަން ނުޖެހޭ ގޮތަށް ލާމަރުކަޒީ ޤާނޫނަށް ގެނައުމަށް ހުށައެޅި އިސްލާހު މިއަދު ރައްޔިތުންގެ މަޖިލީހުންފާސްކޮށްފިއެވެ.
ސަރުކާރުގެ ފަރާތުން ހޯރަފުށީ ދާއިރާގެ މެންބަރު އަލީ މޫސާ ހުށައެޅުއްވި މި އިސްލާހު ފާސްވެފައިވަނީ މަޖިލީހުގެ ވޯޓުގައި ބައިވެރިވި 66 މެންބަރުންގެ ތެރެއިން 55 މެންބަރުންގެ ތާއީދާ އެކުގައެވެ. މި އިސްލާހުގެ މައިގަނޑު މަޤްސަދަކީ ކައުންސިލްތަކުގެ މެންބަރުންގެ ގޮނޑި ހުސްވުމުގެ ސަބަބުން ތަކުރާރުކޮށް ބާއްވަންޖެހޭ ބައި-އިލެކްޝަންތަކަށް ހިނގާ ޚަރަދު ކުޑަކުރުމެވެ.
މި އިސްލާހުގެ ދަށުން، ކައުންސިލްގެ ރައީސްގެ މަޤާމު ނުވަތަ މެންބަރެއްގެ މަޤާމު ހުސްވާއިރު، އެ ކައުންސިލްގެ ދައުރު ހަމަވާން 548 ދުވަސް ނުވަތަ އެއަށްވުރެ ކުރު މުއްދަތެއް އޮތްނަމަ، އެ މަޤާމަށް އަލުން މެންބަރަކު އިންތިޚާބު ކުރުން ލާޒިމެއް ނުވާނެއެވެ. މި އުސޫލު އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންނަށްވެސް ހިނގާނެއެވެ.
ލާމަރުކަޒީ ޤާނޫނަށް މި އިސްލާހު ގެނައުމުގެ މުހިންމުކަން ފާހަގަކުރެވިފައިވަނީ ފަހަކަށް އައިސް ކައުންސިލްތަކުގެ މެންބަރުންގެ ގޮނޑިތައް ހުސްވާ މިންވަރު އިތުރުވެ، އެކަމުގެ ސަބަބުން ގިނަ އަދަދެއްގެ ބައި-އިލެކްޝަންތައް ބާއްވަން ޖެހި، ދައުލަތުގެ ބަޖެޓަށް ބޮޑު ބުރައެއް އުފުލަން ޖެހެމުންދާތީއެވެ.
މި އިސްލާހު ފާސްވުމާއެކު، ކައުންސިލްތަކުގެ ދައުރުގެ ފަހު ދޮޅު އަހަރު ތެރޭގައި ގޮނޑިއެއް ހުސްވިކަމުގައި ވިޔަސް، އެ ގޮނޑިއަކަށް ބައި-އިލެކްޝަނެއް ބޭއްވުމަކާ ނުލައި ކައުންސިލްގެ މަސައްކަތްތައް ކުރިއަށް ގެންދެވޭނެއެވެ.