އަންނަ ޖޫން މަހުގެ ފަސް ވަނަ ދުވަހު ފާހަގަކުރާ ދުނިޔޭގެ ތިމާވެށީގެ ދުވަހާ ގުޅުވައިގެން ހުޅުމާލެ ކޮމިއުނިޓީ އެލައެންސްގެ ފަރާތުން ކުރެހުމުގެ މުބާރާތެއް ބޭއްވުމުގެ ތައްޔާރީތައް ފަށައިފިއެވެ.
މުޖުތަމައުގެ އެއްބައިވަންތަކަމާއި ގުޅުން ވަރުގަދަކުރުމަށް އުފައްދާފައިވާ މި ޖަމިއްޔާއިން އިންތިޒާމުކުރާ ކުރެހުމުގެ މުބާރާތް އޮންނާނީ ޖޫން 19 ވަނަ ދުވަހު ހުޅުމާލެ ރެހެންދި ސްކޫލުގައެވެ. މުބާރާތުގެ ކުރެހުންތައް ދައްކާލުން އޮންނާނީ އެދުވަހުގެ ހަވީރު 4 އިން 6 އަށެވެ.
މިއަހަރުގެ މުބާރާތުގެ ޝިއާރަކީ “ބީޓް ޕްލާސްޓިކް ޕޮލިއުޝަން” ކަމަށް އެ ޖަމިއްޔާއިން ހާމަކޮށްފައިވެއެވެ. މުބާރާތުގައި އެންމެ މޮޅު ތިން ކުރެހުން ހޮވައި، އިނާމު ދިނުމަށް ވަނީ ހަމަޖެހިފައެވެ.
މިއަހަރުގެ މުބާރާތް ރެހެންދި ސްކޫލުގައި ބޭއްވުމަށް ނިންމާފައިވަނީ އެ ސްކޫލުން މުބާރާތް ބޭއްވުމުގައި ދެއްކި ޝައުގުވެރިކަމާ ގުޅިގެންނެވެ. މުބާރާތުގައި ބައިވެރިވުމުގެ ފުރުސަތު ހުޅުވާލާފައިވަނީ ސްކޫލް ކުދިންނަށް ކަމަށްވާއިރު، ބައިވެރިވުމުގެ ސުންގަޑިއަކީ މެއި 15 އެވެ.
ހުޅުމާލެ ކޮމިއުނިޓީ އެލައެންސްއިން މަޢުލޫމާތު ދީފައިވާ ގޮތުގައި މުބާރާތުގައި ރެހެންދި ސްކޫލުގެ އެންވަޔަރަމަންޓް ކްލަބުގެ ފަރާތުން އެކަނި 100 އަށްވުރެ ގިނަ ކުދިންގެ ކުރެހުން ފެންނާނެއެވެ. އަދި މުބާރާތުގައި ހުށަހަޅާ ކުރެހުންތަކުގެ ތެރެއިން އެންމެ ރީތި 12 ކުރެހުން ހޮވައި، 2026 ވަނަ އަހަރު އެ ޖަމިއްޔާއިން އާންމުކުރާ ކަލަންޑަރުގައި ހިމެނުމަށް ވަނީ ނިންމާފައެވެ.