ރާއްޖޭގެ ފެރީ ނިޒާމު ތަރައްގީކޮށް މުޅި ރާއްޖެ ގުޅުވާލުމަށް އިންޑިއާއިން ދޭ 100 މިލިއަން ރުފިޔާގެ މަޝްރޫޢުތަކުގެ އެއްބަސްވުމުގައި މިއަދު ދިވެހިރާއްޖެ އާއި އިންޑިއާއިން ސޮއިކޮށްފިއެވެ. މި އެއްބަސްވުމުގައި ސޮއިކުރެވުނީ ޚާރިޖީ ވުޒާރާގައި ބޭއްވުނު ޚާއްސަ ރަސްމިއްޔާތެއްގައެވެ.
“ހައި އިމްޕެކްޓް ކޮމިއުނިޓީ ޑިވެލޮޕްމަންޓް” ސްކީމްގެ ތިންވަނަ ފިޔަވަހީގެ ދަށުން ކުރިއަށްގެންދާ މި މަޝްރޫޢުތަކުގެ އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ޚާރިޖީ ވަޒީރު ޑރ. ޢަބްދުﷲ ޚަލީލް އާއި އިންޑިއާގެ ފަރާތުން އެ ޤައުމުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ބާލަސުބްރަމާނިއަންއެވެ. އަދި މަޝްރޫޢުތަކުގެ ތަންފީޒީ ފަރާތުގެ ގޮތުން ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ސޮއިކުރެއްވިއެވެ.
ޚާރިޖީ ވަޒީރު ޑރ. ޚަލީލް ވިދާޅުވި ގޮތުގައި މި މަޝްރޫޢުތަކުގެ ދަށުން އާރުޓީއެލް ފެރީތައް ބަނުމަށް 100 މިލިއަން ރުފިޔާގެ މާލީ އެހީތެރިކަން އިންޑިއާ ސަރުކާރުން ފޯރުކޮށްދެއްވާނެއެވެ. އަދި މި އެހީގެ ދަށުން 13 މަޝްރޫޢެއް ކުރިއަށް ގެންދެވޭނެ ކަމަށާއި، މީގެ ސަބަބުން ރައްޔިތުންގެ ދިރިއުޅުމަށް ގިނަގުނަ ފަސޭހަތަކެއް ލިބިގެންދާނެ ކަމަށް އެ މަނިކުފާނު ވިދާޅުވިއެވެ.
ދަތުރުފަތުރާ ބެހޭ ވަޒީރު މުޙައްމަދު އަމީން ފާހަގަކުރެއްވި ގޮތުގައި މިހާތަނަށް 9 އަތޮޅެއްގެ 81 ރަށް ވަނީ ފެރީ ނިޒާމުން ގުޅާލެވިފައެވެ. އަދި މި ނިޒާމުގެ ތެރެއިން ކޮންމެ ރަށެއްވެސް ވަނީ އެއަރޕޯޓަކާ ގުޅުވާލެވިފައި ކަމަށް އެ މަނިކުފާނު ވިދާޅުވިއެވެ.
އިންޑިއާގެ ހައި ކޮމިޝަނަރު ބަލަސުބްރަމާނިއަމް ވިދާޅުވި ގޮތުގައި މިއީ އިންޑިއާގެ “ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްސް” ގެ ދަށުން ދެވޭ އެހީއެކެވެ. އަދި މި ޕްރޮގްރާމްގެ ދަށުން ޖުމްލަ 78 މަޝްރޫޢަކަށް އެހީ ދިނުމަށް ވަނީ ހަމަޖެހިފައި ކަމަށް އޭނާ ވިދާޅުވިއެވެ. އިންޑިއާގެ “ފުރަތަމަ އަވައްޓެރި” ސިޔާސަތުގެ ދަށުން ދިވެހިރާއްޖެއަކީ އެހީތެރިކަން ފޯރުކޮށްދިނުމުގައި ޚާއްސަ އިސްކަމެއް ދެވޭ ޤައުމެއް ކަމަށްވެސް އޭނާ ފާހަގަކުރެއްވިއެވެ.