އައްޑޫ ސިޓީއަށް މަސްތުވާތަކެތި އެތެރެކޮށް، އޭގެ ވިޔަފާރި އެންމެ ވަރުގަދައަށް ކުރާ މީހުންގެ ތެރޭގައި ހިމެނޭ ކަމަށް ފުލުހުން ތުހުމަތުކުރާ އިބްރާހިމް ރަޝީދު (އަބުޗާ) އަށް އުމުރު ދުވަހުގެ ޖަލު ހުކުމެއް އިއްވައިފިއެވެ.
އުމުރުން 38 އަހަރުގެ އަބުޗާގެ މައްޗަށް މި ހުކުމް އިއްވީ ހިތަދޫ މެޖިސްޓްރޭޓް ކޯޓުންނެވެ. މިއީ ރާއްޖެއަށް ގިނަ އަދަދެއްގެ މަސްތުވާތަކެތި އެތެރެކުރި މައްސަލައިގައި ކުރިއަށް ގެންދެވުނު ޝަރީއަތްތަކަށް ފަހު އިއްވި ހުކުމެކެވެ.
މަސްތުވާތަކެތި ޓްރެފިކް ކުރުމުގެ ދެ ދައުވާއަށް އަބުޗާ އިއުތިރާފުވެ، ދައުލަތާއެކު އެއްބަސްވުމެއް ހަދާފައިވެއެވެ. އޭނާގެ މައްޗަށް އަސްލު 50 އަހަރުގެ ޖަލު ހުކުމެއް އައި ނަމަވެސް، އިއުތިރާފުވުމުން ދިން ލުޔެއްގެ ގޮތުން އެ ހުކުމް ވަނީ 25 އަހަރަށް ކުޑަކޮށްފައެވެ. މައްސަލައާ ގުޅިގެން އޭނާ ބަންދުގައި ހޭދަކޮށްފައިވާ ހަތަރު އަހަރު އުނިކުރުމުން، ދެން އޭނާ ޖަލުގައި ހޭދަކުރަންޖެހޭނީ 21 އަހަރެވެ.
ފުލުހުންގެ މައުލޫމާތު ދައްކާ ގޮތުން، 2020 ވަނަ އަހަރުގެ އޮކްޓޯބަރު މަހު ހިންގި ޚާއްސަ އޮޕަރޭޝަނެއްގައި އަބުޗާ އަތުން 61 ކިލޯގެ ޑައިމޯފިނާއި 17.97 ކިލޯގެ މެޓަމްފެޓަމިން ރެސިމޭޓް އަތުލައިގަނެފައިވެއެވެ. މި އޮޕަރޭޝަނުގައި އޭނާއާއެކު އިތުރު 17 މީހަކު ވެސް ހައްޔަރުކޮށްފައިވެއެވެ.
ފުލުހުންގެ ރެކޯޑުތަކުން ދައްކާ ގޮތުގައި އަބުޗާއަކީ މަސްތުވާތަކެތީގެ މައްސަލަތަކުގައި މީގެ ކުރިން އަށް ފަހަރު ހައްޔަރުކޮށްފައިވާ މީހެކެވެ. މީގެ އިތުރުން ޖަމާއަތް ހަދައިގެން ރޭޕްކުރުމާއި، މާރާމާރީ ހިންގުމާއި، ނުރުހުމުގައި ބަދުއަހުލާގީ އަމަލު ހިންގަން އުޅުމާއި، އަމުރަށް ނުކިޔަމަންތެރިވުން ފަދަ އެކި ބާވަތުގެ މައްސަލަތަކުގައި ވެސް ހައްޔަރުކޮށްފައިވާ ކަމަށް ފުލުހުން ބުނެއެވެ.