ރާއްޖެއަށް ލިބިފައިވާ އެންމެ ބޮޑު ނިޢުމަތަށް ރައްކާތެރިވެވޭނީ، ދިރޭ ތަކެތީގެ ނަސްލު ހިމާޔަތްކޮށް ދަމަހައްޓައިގެން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
ބައިނަލްއަގުވާމީ ދިރޭތަކެތީގެ ނަސްލުގެ ދުވަހާ ގުޅުވައިގެން ސޯޝަލް މީޑިއާގައި ހިއްސާ ކުރެއްވި ޕޯސްޓެއްގައި ރައީސް މުޢިއްޒު ވިދާޅުވެފައިވަނީ ޤުދުރަތީ ރީތިކަމަކީ ދިވެހިރާއްޖެއަށް ލިބިފައިވާ އެންމެ ބޮޑު ނިޢުމަތް ކަމަށެވެ. އަދި މި އަގުހުރި ނިޢުމަތް ދެމެހެއްޓުމަށް ދިރޭ ތަކެތީގެ ނަސްލު ހިމާޔަތްކުރުމުގެ މުހިންމުކަން ފާހަގަކުރައްވާފައިވެއެވެ.
ރާއްޖޭގެ މުރަކައާއި ފަރުތަކުގެ ނިޒާމަކީ ރާއްޖެއަށް ލިބިފައިވާ އެންމެ މުއްސަނދި ގުދުރަތީ ނިޒާމެވެ. 8900 އަކަ ކިލޯމީޓަރުގެ ސަރަޙައްދެއް ހިއްސާކުރާ މި ނިޒާމަކީ ދުނިޔޭގެ މުރަކައާއި ފަރުތަކުގެ 5 އިންސައްތައެވެ. އަދި ދުނިޔޭގެ ނިސްބަތުން 7 ވަނައަށް އެންމެ ބޮޑު މުރަކައާއި ފަރުތަކުގެ ނިޒާމު އޮތް ޤައުމަކީ ދިވެހިރާއްޖެއެވެ.
ރާއްޖޭގެ ދޮންވެލި ގޮނޑުދޮށްތަކާއި ސާފު ރީތި މޫދަކީވެސް ރާއްޖެއަށް ލިބިފައިވާ އަގުހުރި ގުދުރަތީ ވަސީލަތްތަކެކެވެ. މި ގުދުރަތީ ރީތިކަމުގެ ސަބަބުން ދުނިޔޭގެ އެކި ކަންކޮޅުތަކުން ގިނަ ފަތުރުވެރިން ރާއްޖެއަށް ޒިޔާރަތްކުރެއެވެ. އަދި މި ގުދުރަތީ ރީތިކަމުގެ ސަބަބުން ރާއްޖެ މަޝްހޫރުވެފައިވަނީ “ދުނިޔެމަތީގެ ސުވަރުގެ” ގެ ގޮތުގައެވެ.
މިއަހަރުގެ ބައިނަލްއަގުވާމީ ދިރޭތަކެތީގެ ނަސްލުގެ ދުވަސް ފާހަގަކުރަނީ “ހާމަރނީ ވިތް ނޭޗަރ އެންޑް ސަސްޓެއިނަބަލް އެނަރޖީ” މި ޝިއާރުގެ ދަށުންނެވެ.