ދިވެހީންގެ އުފެއްދުންތެރިކަމުގެ މައުރަޒު 2025ގައި ސަރުކާރު ހިއްސާވާ ކުންފުނިތަކުގެ ދާއިރާއިން އެއްވަނަ ސްޓެލްކޯއަށް ލިބިއްޖެއެވެ. މި އިނާމު ދިނުމުގެ ރަސްމިއްޔާތު ބޭއްވުނީ ރޭ ސޯޝަލް ސެންޓަރުގައި ރައީސް ޑރ. މުހައްމަދު މުއިއްޒުގެ ޝަރަފުވެރިކަމުގެ ދަށުންނެވެ.
ސްޓެލްކޯއިން މި އިނާމު ހާސިލުކޮށްފައިވަނީ "ރީޖަނަލް ސްކާޑާ" ސިސްޓަމް މައުރަޒުގައި ބައިވެރިކޮށްގެންނެވެ. މިއީ އެ ކުންފުނިން ހިދުމަތްދޭ ރަށްތަކުގެ ކަރަންޓު އުފެއްދުމުގެ ކަންތައްތައް މޮނިޓަރ ކުރުމަށް ތަރައްގީކޮށްފައިވާ ނިޒާމެކެވެ. މި އިނާމާ ހަވާލުވެލެއްވީ ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީއެވެ.
ސްޓެލްކޯއިން ފާހަގަކުރި ގޮތުގައި މި ނިޒާމަކީ ކަރަންޓަށް ދިމާވާ އެކިއެކި މައްސަލަތައް ހައްލުކޮށް، ކަރަންޓު ކެނޑުން މަދުކުރުމަށް އެހީތެރިވެދޭނެ ނިޒާމެކެވެ. މީގެއިތުރުން، ކުރިއަށް އޮތްތަނުގައި ކަރަންޓު ބޭނުންވާނެ މިންވަރު އަންދާޒާކުރުމަށްވެސް މި ނިޒާމު މަގުފަހިކޮށްދޭނެއެވެ.
ދިވެހީންގެ އުފެއްދުންތެރިކަމުގެ މައުރަޒުން އެއްވަނަ، ސްޓެލްކޯއަށް،
މި އެވޯޑް ލިބުމާއި ގުޅިގެން ސްޓެލްކޯއިން ވަނީ އެކަން ކާމިޔާބުކުރުމަށް އެމަސައްކަތް ކުރި ޓީމަށް ހާއްސަ ޝުކުރެއް ދަންނަވާފައެވެ.
"މި ކާމިޔާބީއަކީ ސްޓެލްކޯގެ މުވައްޒަފުންގެ މިންނެތް މަސައްކަތާއި ވިސްނުންތެރިކަމުގެ ނަތީޖާ، މި ކާމިޔާބީގައި ހުރިހާ މުވައްޒަފުންގެ ދައުރު ވަރަށް ބޮޑު، އެކަމަށްޓަކައި ޝުކުރު ދަންނަވަން،" ސްޓެލްކޯ
ދިވެހީންގެ އުފެއްދުންތެރިކަމުގެ މައުރަޒަކީ ރައީސުލްޖުމްހޫރިއްޔާގެ އިސްނެންގެވުމުގެ ދަށުން، 19 މޭ 2024 ގައި ވަޒީރުންގެ މަޖިލީހުގެ ލަފާއާއެކު ފެށުނު މައުރަޒެކެވެ. މި މައުރަޒުގެ މައިގަނޑު މަގްސަދަކީ ދިވެހިރާއްޖޭގެ އުފެއްދުންތެރިކަން އިތުރުކޮށް ވިޔަފާރި ފުޅާކުރުމެވެ.
މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑާއި ބިޒްނަސް ސެންޓަރ ކޯޕަރޭޝަން (ބީ.ސީ.ސީ) ގުޅިގެން އިންތިޒާމުކުރި މި މައުރަޒަކީ މިހާތަނަށް ރާއްޖޭގައި ބޭއްވުނު އުފެއްދުންތެރިކަމުގެ އެންމެ ބޮޑު މައުރަޒެވެ. މައުރަޒު ކުރިއަށްދަނީ 23 މެއިން 31 މޭގެ ނިޔަލަށެވެ.