ސެންޓްރަލް ޕާކުގައި، ދިވެހީންގެ އުފެއްދުންތެރިކަމުގެ މައުރަޒު 2025 މިރޭ ރަސްމީކޮށް ހުޅުވައިދެއްވައިފި އެވެ. މައުރަޒު އިފުތިތާހުކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި އަނބިކަނބަލުން، ފަސްޓްލޭޑީ ސާޖިދާ މުހައްމަދެވެ. މި ރަސްމިއްޔާތުގައި ރައީސްގެ ދެކަނބަލުންނާއި ދައުލަތުގެ އިސް ވެރިން ބައިވެރިވެ ވަޑައިގެންނެވި އެވެ.
މި މައުރަޒުގައި ޖުމްލަ 383 ފަރާތަކުން ބައިވެރިވެފައިވާ އިރު، 14 ކެޓެގަރީއަކުންނާއި 82 ސަބް ގިންތިއަކުން ތަކެތި ހުށަހަޅާފައިވެއެވެ. އެންމެ ގިނަ ބައިވެރިން ވަނީ އަތްތެރި މަސައްކަތުގެ ދާއިރާއިން ކަމަށް ވާއިރު، މައުރަޒުގައި ހދ. އަތޮޅުން ފެށިގެން ލ. އަތޮޅާ ހަމައަށް ގިނަ ރަށްތަކަކުން ބައިވެރިވެފައިވެއެވެ. މައުރަޒުގައި އެންމެ ގިނަ ތަކެތި ބައިވެރިކޮށްފައިވަނީ މާލެ އާއި ބ. ތުޅާދޫއިންނެވެ.
ސެންޓްރަލް ޕާކުގައި، ދިވެހީންގެ އުފެއްދުންތެރިކަމުގެ މައުރަޒު؛ ރައީސްގެ ދެކަނބަލުން މައުރަޒު އިފުތިތާހުކޮށްދެއްވުން
މައުރަޒު ހުޅުވުމަށްފަހު ރައީސްގެ ދެކަނބަލުން ވަނީ މައުރަޒުގައި ހުރި ސްޓޯލްތަކަށް ޒިޔާރަތްކުރައްވައި، އެ ސްޓޯލްތައް ބައްލަވާލައްވާފައެވެ. މި މައުރަޒުގައި 3،600 އަށްވުރެ ގިނަ ތަކެތި ބައިވެރިކޮށްފައިވާކަން ފާހަގަކުރެވެއެވެ.
މި މައުރަޒަކީ ދިވެހިރާއްޖޭގެ އުފެއްދުންތެރިކަން އިތުރުކޮށް ވިޔަފާރި ފުޅާކުރުމުގެ މަޤްޞަދުގައި ބާއްވާ މައުރަޒެކެވެ. މި މައުރަޒު ބޭއްވުމަށް ރައީސުލްޖުމްހޫރިއްޔާ ނިންމަވާފައިވަނީ ވަޒީރުންގެ މަޖިލީހުގެ ލަފާފުޅާއެކު 2024 މެއި 20 ގައެވެ.
މިރެއިން ފެށިގެން އާންމުންނަށް މައުރަޒަށް ޒިޔާރަތްކުރެވޭނެ އެވެ. މިރޭ މައުރަޒު ހުޅުވިފައި ހުންނާނީ 11:00 އާ ހަމައަށެވެ. އަދި މާދަމާއިން ފެށިގެން މި މަހުގެ 31 ވަނަ ދުވަހުގެ ނިޔަލަށް މައުރަޒު ކުރިއަށްދާނެ ކަމަށް ވަނީ ހަމަޖެހިފައެވެ…