ބޭންކް އޮފް މޯލްޑިވްސް (ބީއެމްއެލް) އިން ރާއްޖޭގެ ރަށްތަކުގައި އޭޓީއެމް ގާއިމްކޮށްދިނުމުގެ މަސައްކަތް ކުރަނީ ވިޔަފާރީގެ އުސޫލަށްވުރެ ބޮޑަށް، ހިދުމަތެއް ފޯރުކޮށްދިނުމުގެ ނިޔަތުގައި ކަމަށް ސިޓީތަކާއި ކައުންސިލްތަކާ ބެހޭ ވަޒީރު އާދަމް ޝަރީފް އުމަރު ވިދާޅުވެއްޖެއެވެ.
ށ. ޅައިމަގުގައި އޭޓީއެމް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން، ވަޒީރު ފާހަގަކުރެއްވި ގޮތުގައި ރައްޔިތުންނަށް ފަސޭހަކޮށްދިނުމަކީ ރައީސް ޑރ. މުހައްމަދު މުއިއްޒުގެ ވަރަށް ހާއްސަ އިސްނެންގެވުމެކެވެ. އަދި ސަރުކާރާއި ކުންފުނިތަކާއި ކައުންސިލްތައް ގުޅިގެން ރައްޔިތުންނަށް ލުއިފަސޭހަކަން ފޯރުކޮށްދިނުމަށް ރައީސް އިސްކަންދެއްވާ ކަމަށް ވެސް ވިދާޅުވިއެވެ.
“މިއަދު ބޭންކުގެ ހިދުމަތް ޅައިމަގުގައި ފެށިގެންދާކަމީ ރައީސްގެ ވަރަށް ހާއްސަ އިސްނެންގުވުމެއްގެ ތެރެއިން ހިނގަމުންދާ ކަމެއް،” ވަޒީރު ވިދާޅުވިއެވެ. އަދި މި މަސައްކަތް މިހާ ހަލުވި ސްޕީޑެއްގައި ކުރިއަށް ގެންދެވުމަށްޓަކައި ބީއެމްއެލްގެ ސީއީއޯ ޓީމަށް ޝުކުރު އަދާކުރެއްވިއެވެ.
ވަޒީރު އާދަމް ޝަރީފް އިތުރަށް ފާހަގަކުރެއްވި ގޮތުގައި، ރައީސް މުއިއްޒު ވެރިކަމަށް ހޮވުމާއެކު ރައްޔިތުން މިހާރު އިންތިޒާރު ކުރަމުންދަނީ އެމަނިކުފާނުގެ ވައުދުތައް ފުއްދަވައި ނިންމާނެ ދުވަހަކަށެވެ. އަދި މިހާރު ސަރުކާރުން އެންމެ އިސްކަމެއް ދެއްވަނީ ރައްޔިތުންނަށް ހުރި ތަކުލީފުތައް ކުޑަކުރުމަށާއި އިހްލާސްތެރިކަމާއެކު މަސައްކަތް ކުރުމަށް ކަމަށް ވެސް ވިދާޅުވިއެވެ.
“ރައީސްގެ ވަރަށް ހާއްސަ އިސްނެންގެވުމަކާއެކު މި މަސައްކަތްތަކަކީ ރައްޔިތުންނަށް ލުއި ފަސޭހަކަން ގެނެސްދިނުމަށް ރައީސް ނިންމެވި ހާއްސަ ނިންމެވުމެއް،” ވަޒީރު ވިދާޅުވިއެވެ. އަދި ސަރުކާރުގެ އަމާޒަކީ މިފަދަ ކަންކަން ވީހާވެސް ރަނގަޅަށް އިންތިޒާމްކުރެވިގެން، އެންމެން ޝާމިލްވާ ކަމެއްގެ ގޮތުގައި ރައްޔިތުންނަށް އަވަހަށް ހިދުމަތް ދެވޭނެ ގޮތް ހެދުން ކަމުގައި ވެސް ފާހަގަކުރެއްވިއެވެ.