ޕަބްލިކް ސެކްޓަރ އިންވެސްޓްމަންޓް ޕްރޮގްރާމްގެ ދަށުން އދ. މަހިބަދޫ ފުޓްސަލް ދަނޑާއި މަގު ހެދުމުގެ މަޝްރޫޢުއަށް ބޭނުންވާ ސާމާނު ފޮނުވުމުގެ މަސައްކަތް ކުރިއަށްދާ ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން މިއަދު ވަނީ ހާމަކޮށްފައެވެ.
އާރްޑީސީން މައުލޫމާތު ދެއްވި ގޮތުގައި މަހިބަދޫ ފުޓްސަލް ދަނޑު ތަރައްޤީ ކުރުމުގެ މަޝްރޫޢުގެ ދަށުން މިދިޔަ މަހު ފުޓްސަލް ދަނޑުގައި ހުރި ކުރީގެ ޓާފްތައް ނެގުމުގެ މަސައްކަތް ވަނީ ނިންމާލާފައެވެ. މި މަސައްކަތަކީ އަލަށް ޓާފް އެޅުމުގެ ކުރިން ކުރަންޖެހޭ މުހިންމު މަސައްކަތެކެވެ.
މަހިބަދޫ މަގު ހެދުމުގެ މަޝްރޫޢުއަށް 42.7 މިލިއަން ރުފިޔާ ޚަރަދުކުރާއިރު، މި މަޝްރޫޢު އާރްޑީސީއާ ހަވާލުކުރެވުނީ 2023 ވަނަ އަހަރުގެ އޮގަސްޓް މަހުގެ ތެރޭގައެވެ. މި މަޝްރޫޢު 420 ދުވަހުގެ ތެރޭގައި ނިންމުމަށް ވަނީ ހަވާލުކޮށްފައެވެ.
މި މަޝްރޫޢުގެ ދަށުން ކުރިއަށްދާ މަސައްކަތްތަކުގެ ތެރޭގައި 2.035 ކިލޯމީޓަރުގެ މަގުގައި ގާ އެތުރުމާއި، މަގުތަކުގައި ފެން ހިންދާ ނިޒާމް ގާއިމްކުރުމުގެ އިތުރުން މަގުބައްތި ޖެހުމުގެ މަސައްކަތްތައް ހިމެނެއެވެ. މިއީ ރަށުގެ އުމްރާނީ ތަރައްޤީއަށް ގެނެވޭ މުހިންމު ކުރިއެރުމެކެވެ.
އާރްޑީސީން ފާހަގަކުރި ގޮތުގައި މި ސަރުކާރު ވެރިކަމާ ހަވާލުވިއިރު ގިނަ އަދަދެއްގެ ރަށްރަށުގެ އުމްރާނީ މަސައްކަތްތައް ހުއްޓިފައި ވީނަމަވެސް، މިހާރު ދަނީ އެފަދަ މަޝްރޫޢުތަކުގެ މަސައްކަތްތައް އަލުން ފެށުމަށް ތައްޔާރުވަމުންނެވެ. މިގޮތުން ރަށްރަށުގެ ހުއްޓިފައިވާ މަގުތައް ހެދުމުގެ މަސައްކަތާއި ނަރުދަމާގެ މަސައްކަތްތައް ބާރު ސްޕީޑުގައި ކުރިއަށް ގެންދެވެއެވެ.