ތުއްތު ކުދިންގެ ބަނޑުހަރުވުމާއި ވައިހެދުމަކީ ވަރަށް ގިނައިން ދިމާވާ މައްސަލައެކެވެ. މިއީ ކުޑަކުދިންނަށް ވަރަށް އުނދަގޫވެ، ރުއިމާއި ގިސްލުން އިތުރުވެ، މައިންބަފައިންނަށްވެސް ވަރަށް ކަންބޮޑުވާ ކަމަކަށް ވެއެވެ. ނަމަވެސް މިކަމަށް ހައްލު ހޯދުމަށް ކުރެވިދާނެ ގިނަ ކަންތައްތަކެއް ވެއެވެ.
ކާންދިނުމުގައި ސަމާލުވާންވީ ކަންކަން
ދަރިފުޅުގެ ބަނޑުހަރުވުމާއި ވައިހެދުން ކޮންޓްރޯލް ކުރުމުގައި އެންމެ މުހިންމު އެއްކަމަކީ ކާންދިނުމުގައި ސަމާލުކަން ދިނުމެވެ. ގާތުން ކިރުދޭނަމަ، މާގިނައިރު މަޑުނުކޮށް ކިރުދިނުމާއި، ބަނޑު މާބޮޑަށް ނުފުރެންދެން ކިރުދިނުމަކީ މުހިންމު ކަމެކެވެ. އަދި ކިރުދޭއިރު ދަރިފުޅުގެ ބޯކޮޅު އުސްކޮށް ބެހެއްޓުމަކީވެސް މުހިންމު ކަމެކެވެ.
ބުއްފުޅި ދިނުމުގައި ބަލަންވީ ކަންކަން
ބުއްފުޅި ދޭނަމަ، ޑޮކްޓަރެއްގެ ލަފާގެ މަތިން ރަނގަޅު ވައްތަރެއްގެ ކިރު އިޚްތިޔާރުކުރުމަކީ މުހިންމު ކަމެކެވެ. ބުއްފުޅި ތައްޔާރުކުރުމުގައި ދަޅުގައިވާ އިރުޝާދުތަކަށް ފަރުވާތެރިވުމާއި، ސާފުތާހިރުކަމަށް ސަމާލުކަން ދިނުމަކީވެސް މުހިންމު ކަމެކެވެ. އަދި ބުއްފުޅި ތައްޔާރުކުރާއިރު، ކިރު އަޅައިގެން ހެލުވުމުގެ ބަދަލުގައި ގިރާފައި ބުއްފުޅިއަށް އެޅުން މުހިންމެވެ.
ތުއްތު ދަރިފުޅުގެ ބަނޑުހަރުވުމާއި ބަނޑުގައި ވައިހެދުން؛ ހައްލުކުރުމަށް ކުރެވިދާނެ ކަންތައް ދެނެގަތުން މުހިންމު… ފޮޓޯ: ބޭބީސްޕޭޖު
މަސާޖު ކުރުން
ދަރިފުޅުގެ ބަނޑުހަރުވުމާއި ވައިހެދުމަށް ހައްލު ހޯދުމަށް މަސާޖް ކުރުމަކީ ވަރަށް މުހިންމު ކަމެކެވެ. ބަނޑުގައި މަޑުމަޑުން މަސާޖް ކުރުމާއި، ކަކުލު ދެކޮޅު ބަނޑާ ހަމައަށް ގެނެސް ދޫކޮށްލުމަކީ ވަރަށް ފައިދާހުރި ކަމެކެވެ. އަދި ބައިސްކަލް ދުއްވާ އުސޫލުން ފައިދެކޮޅު ޙަރަކާތްކުރުވުމަކީވެސް ބަނޑުހަރުވުމަށް ވަރަށް ރަނގަޅު ކަމެކެވެ.
ވައިލެއްވުމާއި ބާއްވަން ޖެހޭ ގޮތް
ކޮންމެ ފަހަރަކު ކިރުދީ ނިމުމުން ވައިލެއްވުމަކީ ވަރަށް މުހިންމު ކަމެކެވެ. މީގެ އިތުރުން ކިރުދީ ނިމުމަށްފަހު ބޯކޮޅު އުސްކޮށް އިރުކޮޅަކު ބެހެއްޓުމަކީވެސް ވައިހެދުން ކޮންޓްރޯލް ކުރުމަށް ވަރަށް މުހިންމު ކަމެކެވެ.
ފޯމިއުލާ ދޭނަމަ، ބައެއް ފަހަރު ކިރުދިނުމުގެ ދެމެދުން ފެންކޮޅެއް ދިނުމަކީވެސް ބަނޑުހަރުވުން ކޮންޓްރޯލް ކުރުމަށް ރަނގަޅު ކަމެކެވެ. އަދި ދަރިފުޅު އުފާވެ ހެވިފައި އޮންނަ ވަގުތުތަކުގައި މަޑުމަޑުން ބަނޑުގައި މަސާޖް ކުރުމަކީވެސް ވަރަށް ފައިދާހުރި ކަމެކެވެ.
ތުއްތު ކުދިންގެ ބަނޑުހަރުވުމާއި ވައިހެދުމަކީ އާންމު ކަމެއް ނަމަވެސް، މަތީގައި ބަޔާންކުރެވުނު ކަންކަމަށް ސަމާލުކަން ދީގެން މިކަން ކޮންޓްރޯލް ކުރެވިދާނެއެވެ. ނަމަވެސް މައްސަލަ ދިގުލައިގެން ދާނަމަ ނުވަތަ އިތުރަށް ގޯސްވާނަމަ، ޑޮކްޓަރެއްގެ ލަފާ ހޯދުމަކީ މުހިންމު ކަމެކެވެ.