އައިނު ހައްދަން އާސަންދައިން ދެމުން އަންނަ 1000 ރުފިޔާގެ އެލަވަންސް، އަންނަ ޖޫން މަހުން ފެށިގެން 2000 ރުފިޔާއަށް ބޮޑުކުރުމަށް ސަރުކާރުން ނިންމަވާފައިވާ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
ރައީސް މިކަން އިއުލާނު ކުރެއްވީ ބާސެލޯނާ ނަސަންދުރާގައި މިރޭ ބޭއްވި ދުނިޔޭގެ ސިއްހަތު ދުވަހުގެ ހާއްސަ ރަސްމީ ޖަލްސާގައި ވާހަކަފުޅު ދައްކަވަމުންނެވެ. މިއީ ރިޔާސީ އިންތިހާބުގައި ރައީސް ވެވަޑައިގެންނެވި އެއް ވައުދުފުޅު ކަމަށްވެސް އެމަނިކުފާނު ފާހަގަކުރެއްވިއެވެ.
“އެކަމަށްޓަކައި ހަދަން ޖެހޭ ހުރިހާ ހިސާބެއް ހަދާ ނިންމާ. މިހާރު އަޅުގަނޑުވާނީ ކަމާއި ބެހޭ ފަރާތްތަކަށް މިއަދު ސިޓީ ފޮނުވާ، ޖޫން 1 އިން ފެށިގެން އައިނު ހެއްދުމަށްޓަކާ ދޭ 1000 ރުފިޔާ 2000 ރުފިޔާއަށް ބޮޑު ކުރެވިގެންދާނެ،” ރައީސް މުއިއްޒު ވިދާޅުވިއެވެ.
މި ބަދަލަކީ ދައުލަތަށް ރައްކާ ކުރެވޭ ފައިސާއިން ރައްޔިތުންނަށް ބޭނުންވާ އެހެނިހެން ހަރަދުތައް ކޮށްދޭ އުސޫލުގެ ތެރެއިން ގެނެވޭ ވަރަށް މުހިންމު ބަދަލެއް ކަމަށް ރައީސް ވިދާޅުވިއެވެ. “އެއީ މިގޮތަށް ސޭވް ކުރާ ސޭވްކުރުމުން ރައްޔިތުންނަށް ކޮށްދޭ ކަމެއް” ކަމުގައި ރައީސް ފާހަގަކުރެއްވިއެވެ.
މީގެއިތުރުން ވެސް ރައްޔިތުންނަށް ކޮށްދޭން ހުރި އެހެނިހެން ކަންތައްތައް ކުރިއަށް ގެންދެވެމުންދާ ކަމަށް ރައީސް މުއިއްޒު ވަނީ ފާހަގަކުރައްވާފައެވެ.