މޯލްޑިވްސް އިމިގްރޭޝަންގެ އޮފިސަރު ޓްރެއިނީގެ 50 މަޤާމަށް މީހުން ހޯދުމަށް ކުރިއަށް ގެންދިޔަ އިމްތިހާނުގައި 549 ފަރާތަކުން ބައިވެރިވެ، އިމްތިހާން ފުރިހަމަކޮށްފިއެވެ.
އިމިގްރޭޝަނުން މަޢުލޫމާތު ދެއްވާފައިވާ ގޮތުގައި، މި މަޤާމުތަކަށް މީހުން ހޯދުމަށް މެއި 24 ގައި ބޭއްވި ވޯކް-އިން އިންޓަވިއުއަށް ޖުމްލަ 861 ފަރާތަކުން ކުރިމަތިލާފައިވެއެވެ. މީގެ ތެރެއިން ޝަރުތު ހަމަވަނީ 758 ފަރާތަކުންނެވެ. މި ވަޒީފާއަށް ކުރިމަތިލުމުގެ ފުރުސަތު ދެވިފައިވަނީ 40 އަހަރު ނުފުރޭ ފަރާތްތަކަށެވެ.
އިމިގްރޭޝަނުން ހާމަކުރެއްވި ގޮތުގައި، އިންޓަވިއުގެ ބައެއްގެ ގޮތުން ބޭއްވި އިމްތިހާން ކުރިއަށް ގެންގޮސްފައިވަނީ މި މަހުގެ 28 އަދި 29 ވަނަ ދުވަހުއެވެ. އަދި އިމްތިހާނުގެ ނަތީޖާއާއެކު، އެންމެ މަތިން މާކްސް ލިބުނު 50 ފަރާތުގެ ނަންތައް ވަރަށް އަވަހަށް އިޢުލާންކުރެވިގެންދާނެ ކަމަށް އެ އިދާރާއިން މަޢުލޫމާތު ދެއްވާފައިވެއެވެ.
އިމްތިހާނުގެ އިންތިޒާމުތައް ބެއްލެވުމަށް ކޮންޓްރޯލަރ ޖެނެރަލް އޮފް އިމިގްރޭޝަން އަޙްމަދު ފަސީހު އަދި ޑެޕިއުޓީ ކޮންޓްރޯލަރު އަޙްމަދު އަޝްފާން ވަޑައިގެންނެވިކަން ފާހަގަކޮށްފައިވެއެވެ.
މި ވަޒީފާތަކަށް މީހުން ހޯދުމަށް ބޭއްވި ވޯކް-އިން އިންޓަވިއުއަކީ އިމިގްރޭޝަނުން މިފަދަ މަޤާމުތަކަށް މީހުން ހޯދުމަށް ފުރަތަމަ ފަހަރަށް ބޭއްވި ވޯކް-އިން އިންޓަވިއު ކަމަށްވެސް އެ އިދާރާއިން ފާހަގަކޮށްފައިވެއެވެ