ރާއްޖޭގައި ސްޕޯޓްސް ފިޝިންގެ ދާއިރާގައި ހަރަކާތްތެރިވާ ފަރާތްތަކަށް އަމާޒުކޮށްގެން ބާއްވާ މަސައްކަތު ބައްދަލުވުމުގައި ބައިވެރިވުމުގެ ފުރުސަތު މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ވަނީ ހުޅުވާލައިފައެވެ. މި ބައްދަލުވުން އޮންނާނީ މިއަންނަ ޖުލައި މަހުގެ 7 ވަނަ ދުވަހު ހެނދުނު 9 އިން ހަވީރު 5 އަށް މާލޭގައެވެ.
މަސްވެރިކަމާ ބެހޭ ވުޒާރާއިން މަޢުލޫމާތު ދެއްވާފައިވާ ގޮތުގައި، "މިއީ މުނިފޫހިފިލުވުމުގެ ގޮތުން ކުރާ މަސްވެރިކަން ނުވަތަ ސްޕޯޓްސް ފިޝިންގައި ޙަރަކާތްތެރިވާ ފަރާތްތަކަށް އަމާޒުކޮށްގެން ބާއްވާ މަސައްކަތު ބައްދަލުވުމެކެވެ." މި ބައްދަލުވުމުގެ މައިގަނޑު މަޤްޞަދަކީ މުނިފޫހިފިލުވުމުގެ ގޮތުން ކުރާ މަސްވެރިކަން ދެމެހެއްޓެނިވި ގޮތެއްގައި ކުރިއެރުވޭނެ ގޮތްތަކާމެދު މަޝްވަރާކުރުމެވެ.
ބައްދަލުވުމުގައި ބައިވެރިވުމަށް ޝައުޤުވެރިވާ ފަރާތްތަކުން ޖޫން މަހުގެ 10 ވަނަ ދުވަހުގެ ކުރިން އެކަމަށް ޚާއްޞަކޮށްފައިވާ އޮންލައިން ފޯމު ފުރިހަމަކުރުމަށްފަހު ވުޒާރާއަށް ހުށަހަޅަންޖެހޭނެއެވެ. ބައިވެރިން ހޮވުމުގައި އިސްކަންދޭނީ ފޯމު ހުށަހަޅާ ތަރުތީބުންނެވެ. އަދި ބައްދަލުވުމުގެ ބައިވެރިންގެ ދަތުރުފަތުރާއި، ހުރުމާއި، ކެއުމުގެ އިންތިޒާމުތައް ހަމަޖައްސައިދޭނެކަމަށް ވުޒާރާއިން ވަނީ ހާމަކޮށްފައެވެ.
ސްޕޯޓްސް ފިޝިންގއަކީ މިހާރު ޒުވާނުންގެ މެދުގައި ވަރަށް މަޤުބޫލު ހަރަކާތަކަށްވެފައިވާއިރު، މި ދާއިރާ އިތުރަށް ތަރައްޤީކުރުމަށް ސަރުކާރުން ވަނީ ފަސް ސަރަހައްދެއްގައި ސްޕޯޓްސް ފިޝިން ބަނދަރުތައް ތަރައްޤީކުރުމަށް ނިންމާފައެވެ. މި ބަނދަރުތަކުގައި މަހުގެ ވިޔަފާރިކުރާނެ ގޮޅިތަކާއި، މުބާރާތްތައް ރާވައި ހިންގާނެ އިދާރީ އޮފީސްތަކާއި، ރެސްޓޯރަންޓް އަދި ކެފޭތަކާއި، މަސްވެރިކަމާ ގުޅޭ ތަކެތި ވިއްކައި ޚިދުމަތްދޭ ތަންތަނާއި، ބާބަކިޔު ހެދޭނެ އިންތިޒާމުތައް ހިމެނޭނެއެވެ.
މި ބައްދަލުވުމާ ބެހޭ އިތުރު މަޢުލޫމާތު ހޯދުމަށް 3339229 ނަންބަރާ ގުޅުއްވުމަށް ވުޒާރާއިން އަންގަވާފައިވެއެވެ. ސްޕޯޓްސް ފިޝިންގއާއި ފަރުމަހުގެ މަސްވެރިކަން އިތުރަށް ފުޅާކުރުމަށް ސަރުކާރުން ކުރަމުންދާ މި މަސައްކަތަކީ މަސްވެރިކަމާއި އިޤްތިޞާދީ މަސައްކަތްތައް ފުޅާކޮށް، އެކަމުން ލިބޭ އާމްދަނީ އިތުރުކުރުމަށް ކުރެވޭ މުހިންމު މަސައްކަތެކެވެ.