ދިވެހީންގެ އުފެއްދުންތެރިކަމުގެ މައުރަޒު ހިންގުމުގެ އެންމެ ބޮޑު އަމާޒަކީ، ދިވެހީންގެ އުފެއްފުންތެރިކަން އިތުރުކޮށް، ޤައުމުގެ ކްރިއޭޓިވް އިންޑަސްޓްރީ ބާރުވެރި ކުރުން ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
މިނިސްޓަރ މިހެން ވިދާޅުވީ މިއަދު އެކްސްގައި ކުރި ޕޯސްޓެއްގައެެވެ.
މިނިސްޓަރ ވިދާޅުވީ ދިވެހީންގެ އުފެއްދުންތެރިކަމުގެ މައުރަޒު 2025 ނުވަތަ މޯލްޑިވްސް އެކްސްޕޯ 2025ގެ ނުވަ ދުވަހުގެ މުއްދަތަށްފަހު ރޭވަނީ ނިމުމަކަށް އައިސްފައިވާ ކަމަށާއި، މިއީ ރައީސުލްޖުމުހޫރިއްޔާ ޑރ. މުހައްމަދު މުއިއްޒުގެ ތަޞައްވުރެއްގައި ކުލަޖެހުން ކަމަށެވެ.
އަދި މިއަހަރުގެ ރިޔާސީ ބަޔާނުގައިވެސް ރައީސް ވިދާޅުވިފަދައިން، މިފަދަ ހަރަކާތެއް ހިންގުމުގެ އެންމެ ބޮޑު އަމާޒަކީ، ދިވެހީންގެ އުފެއްފުންތެރިކަން އިތުރުކޮށް، ޤައުމުގެ ކްރިއޭޓިވް އިންޑަސްޓްރީ ބާރުވެރި ކުރުން ކަމަށާއި، އަދި ޤައުމީ އުފެއްދުންތެރިކަމުގެ ތެރޭގައި ކްރިއޭޓިވް އިކޮނޮމީގެ ޙިއްސާ އިތުރުކުރުން ކަމަށް މިނިސްޓަރ ވަނީ ވިދާޅުވެފައެެވެ.
މި މައުރަޒު ކުރިއަށް ގެންދެވުނީ އެމަޤުޞަދު ޙާޞިލް ކުރުމުގެ އަމާޒަށް ކަމަށާއި، އެހެންކަމުން އުފެއްދުންތެރިކަމުގެ މައުރަޒުގެ އިތުރަށް، ކްރިއޭޓިވް އިކޮނޮމީ ޑިސްޓްރިކްޓަކާއި، ޑިޖިޓަލް ޑިސްޓްރިކްޓެއް އަދި މާކެޓްޕްލޭސް ޑިސްޓްރިކްޓް ނަމުގައި ކާމިޔާބު ހަރަކާތްތަކެއް ވަނީ ހިންގިފައި ކަމަށް މިނިސްޓަރ ވަނީ ވިދާޅުވެފައެވެ.
މިނިސްޓަރ ވިދާޅުވީ ކުޅިވަރާއި، މުނިފޫހި ފިލުވުމުގެ ގިނަ ހަރަކާތްތަކެއް އެންޓަޓައިންމެންޓް ޑިސްޓްރިކްޓްގައި ކުރިއަށް ގެންދެވުނު އިރު، ކުޑަކުދީންނާއި އާއިލާތަކަށް ޚާއްޞަ އެތައް ހަރަކާތެއްވަނީ ކުރިއަށް ގެންދެވިފައިވާ ކަމަށާއި، މިކަމުގައި ހަރަކާތްތެރިވި އެންމެހައި ފަރާތްތަކަށް އަދި ޚާއްސަކޮށް ބީސީސީގެ މެނޭޖުމަންޓާއި މުޅިޓީމާއި މިނިސްޓްރީގެ ޓީމްގެ މަސައްކަތް ފާހަގަކޮށް މިނިސްޓަރ ވަނީ ޝުކުރު އަދާ ކުރައްވާފައެވެ.
މި މަޢުރަޒުގެ ކާމިޔާބީގެ އެންމެ ބޮޑު ސިއްރަކީ، ދިވެހި ފަންނުވެރީންނާއި އުފެއްދުންތެރީންނާއި، ހީވާގި މަސައްކަތްތެރީން، އަދި މަޢުރަޒުގައި އެކި އުފެއްދުމާއި ހުނަރު ބައިވެރިކުރެއްވި ހުރިހާ ފަރާތްތަކަށް ވަކީން ޚާއްޞަ ޝުކުރެއް މިނިސްޓަރ ވަނީ ދަންނަވާފައެވެ.