މާލޭ ސަރަހައްދުން ކަރަންޓު ކެނޑުމާ ގުޅިގެން ކަރަންޓު އިއާދަކުރުމުގެ މަސައްކަތް ކުރަމުން އަންނަ ކަމަށާއި، އަދި އެފަދަ ކަމެއް ތަކުރާރުނުވާނެހެން އިންތިޒާމުތައް ހަމަޖެއްސުމުގެ މަސައްކަތް ކުރަމުންދާ ކަމަށް ފަތުރުވެރިކަމާއި އަދި ތިމާވެއްޓާ ބެހޭ ވަޒީރު ޠާރިޤު އިބްރާހީމް ވިދާޅުވެއްޖެއެވެ.
މިއަދު މާލެއާއި ހުޅުލެ އަދި ހުޅުމާލެއިން ކަރަންޓު ކެނޑުނީ ދިމާވި ޓެކްނިކަލް މައްސަލައެއްގެ ސަބަބުން ކަމަށް ސްޓެލްކޯއިން ބުނެފައިވެއެވެ. އަދި މި މައްސަލަ ހައްލުކުރުމަށް މަސައްކަތްތަކެއް ކުރަމުންދާ ކަމަށާއި، މާލޭގެ ބޮޑު ސަރަހައްދަކަށް މިހާރު ކަރަންޓު އަނބުރާ ދެވިފައިވާ ކަމަށް އެ ކުންފުނިން މައުލޫމާތު ދީފައިވެއެވެ.
މިކަމާ ގުޅިގެން މިނިސްޓަރު ޠާރިޤު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ ކަރަންޓުގެ ޚިދުމަތް އަނބުރާ ދިނުމަށް ކުރަންޖެހޭ ހުރިހާ މަސައްކަތެއް ކުރަމުން އަންނަ ކަމަށެވެ. އަދި “ކުރިމަތިވި މައްސަލަ ދިރާސާކޮށް ބަލައި، ކުރިއަށް އޮތް ތަނުގައި އެފަދަ މައްސަލަތައް ދިމާނުވާނެ ގޮތަށް އިންތިޒާމުތައް ހަމަޖެއްސުމަށް މަސައްކަތް ކުރަމުންދާ” ކަމަށްވެސް ވިދާޅުވިއެވެ.
ހުޅުމާލޭގެ ފުރަތަމަ ފިޔަވައްސަށްވެސް މިހާރު ކަރަންޓު އަނބުރާ އިއާދަކޮށްފައިވާއިރު، ހުޅުލެއިން ކަރަންޓު ކެނޑުނު ނަމަވެސް ވެލާނާ އިންޓަނޭޝަނަލް އެއާޕޯޓުގައި ބެކްއަޕް ކަރަންޓު ބޭނުންކުރުމުގެ ސަބަބުން އެއާޕޯޓުގެ އެއްވެސް އޮޕަރޭޝަނަކަށް ބުރޫއަރާފައިނުވާ ކަމަށް މައުލޫމާތު ލިބިފައިވެއެވެ.
މި މައްސަލައަކީ ސީރިއަސް މައްސަލައެއްގެ ގޮތުގައި ބެލުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަމާ ބެހޭ އިދާރާތަކަށް އިރުޝާދު ދެއްވާފައިވާއިރު، ކަރަންޓު ކެނޑުނު ސަބަބު ދެނެގަތުމަށް ފުލުހުންވަނީ ތަޙުޤީޤެއް ފަށާފައެވެ. އަދި މިނިސްޓަރު ޠާރިޤުވަނީ މާލެއާއި ހުޅުމާލެއިން ކަރަންޓު ކެނޑުމާ ގުޅިގެން ދިމާވެފައިވާ ދަތިތަކަށް މަޢާފަށް އެދިވަޑައިގެންފައެވެ.