ރާއްޖޭގެ އަސްކަރީ ގާބިލުކަން އިތުރުކޮށް، ސަލާމަތާއި ރައްކާތެރިކަން ކަށަވަރުކުރުމަށް އެހީތެރިވުމުގެ ގޮތުން އޮސްޓްރޭލިއާ ސަރުކާރުން ރާއްޖެއަށް ގާޑިއަން ކްލާސް ޕެޓްރޯލް ބޯޓެއް ހަދިޔާ ކުރުމާއެކު އިތުރު އެހީތައް ފޯރުކޮށްދޭން ނިންމައިފިއެވެ.
އޮސްޓްރޭލިއާގެ ބޮޑުވަޒީރުގެ ނައިބު އަދި ޑިފެންސް މިނިސްޓަރު ރިޗާޑް މާލްސް މިއަދު ބަންޑާރަ ކޮށީގައި ބޭއްވި ނޫސްވެރިންގެ ބައްދަލުވުމެއްގައި ވިދާޅުވި ގޮތުގައި، މި އުޅަނދުގެ އިތުރުން ކަނޑުގެ ހައިޑްރޯގްރެފިކް އިކުއިޕްމަންޓްވެސް ހަދިޔާކުރުމަށް ވަނީ ނިންމާފައެވެ. އަދި މަލްޓި-ބީމް އިކޯ ސައުންޑާ އަދި ކެޕޭސިޓީ ބިލްޑިންގްގައިވެސް އެހީތެރިކަން ފޯރުކޮށްދެއްވާނެ ކަމަށް އެމަނިކުފާނު ވިދާޅުވިއެވެ.
ދިފާއީ ވަޒީރު މުހައްމަދު ޣައްސާނު މައުމޫން ވިދާޅުވި ގޮތުގައި، "މި ހަދިޔާއަކީ ރާއްޖޭގެ އަސްކަރިއްޔާގެ ގާބިލުކަން އިތުރުކޮށް، ސަލާމަތާއި ރައްކާތެރިކަން ކަށަވަރުކުރުމަށް ކުރާ މަސައްކަތަށް ލިބޭ ބޮޑު ކުރިއެރުމެކެވެ." އަދި މި ވަސީލަތްތަކުގެ ސަބަބުން، ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ރާއްޖޭގެ އަސްކަރިއްޔާ ކުރިއެރުވުމަށް ކުރައްވާ މަސައްކަތްތަކަށްވެސް ބާރު ލިބިގެންދާނެ ކަމަށް ވަޒީރު ފާހަގަކުރެއްވިއެވެ.
އޮސްޓްރޭލިއާގެ ބޮޑުވަޒީރުގެ ނައިބު ރިޗާޑް މާލްސް ވިދާޅުވީ، އިންޑިއާ ކަނޑުގެ ސަލާމަތާއި ރައްކާތެރިކަން ބެލެހެއްޓުމަކީ އޮސްޓްރޭލިއާއަށްވެސް މުހިންމު ކަމެއް ކަމަށާއި، މި ހަދިޔާއަކީ ހަމައެކަނި އަސްކަރީ އެހީތެރިކަމެއް ނޫން ކަމަށެވެ. މިއީ ދެ ގައުމުގެ ދެމެދުގައި އޮތް އިސްތިރާޖީ ގުޅުން ރަމްޒުކޮށްދޭ ކަމެއް ކަމަށް އެމަނިކުފާނު ފާހަގަކުރެއްވިއެވެ.
މިހާރު ބަނުމުގެ މަސައްކަތް ކުރިއަށްދާ މި އުޅަނދު އަންނަ އަހަރު ރާއްޖެއަށް ލިބޭނެ ކަމަށް ރިޗާޑް މާލްސް ވިދާޅުވިއެވެ. މި އެހީގެ ސަބަބުން ރާއްޖޭގެ ކަނޑުގެ ސަރަހައްދު ހިމާޔަތްކުރުމުގެ ގާބިލުކަން އިތުރުވެ، ކަނޑުގެ ވަސީލަތްތައް ދެމެހެއްޓެނިވި ގޮތެއްގައި ބޭނުންކުރުމަށް މަގުފަހިވެގެންދާނެއެވެ. ދި ކަނޑުގެ ސަރަހައްދުގައި ހިނގާ ގާނޫނާ ހިލާފު ހަރަކާތްތައް ހުއްޓުވުމަށާއި، އިގްތިސާދީ ރައްކާތެރިކަން އިތުރަށް ކަށަވަރު ކުރެވޭނެ އެވެ.