އޮސްޓްރޭލިއާއިން ރާއްޖެއަށް ހަދިޔާކުރާ އަސްކަރީ އުޅަނދުގެ ސަބަބުން ރާއްޖޭގެ އަސްކަރިއްޔާގެ ގާބިލުކަން އިތުރުވެ، ގައުމުގެ ސަލާމަތާއި ރައްކާތެރިކަން ކަށަވަރުކުރުމަށް ބޮޑު ކުރިއެރުމެއް ލިބޭނެ ކަމަށް ދިފާއީ ވަޒީރު މުހައްމަދު ޣައްސާނު މައުމޫން ވިދާޅުވެއްޖެއެވެ.
ރާއްޖޭގެ އަސްކަރީ ގާބިލުކަން އިތުރުކޮށް، ސަލާމަތާއި ރައްކާތެރިކަން ކަށަވަރުކުރުމަށް އެހީތެރިވުމުގެ ގޮތުން އޮސްޓްރޭލިއާ ސަރުކާރުން ރާއްޖެއަށް ގާޑިއަން ކްލާސް ޕެޓްރޯލް ބޯޓެއް ހަދިޔާކުރުމަށް ނިންމާފައިވާއިރު، މި އުޅަނދު އަންނަ އަހަރު ރާއްޖެއަށް ލިބޭނެ ކަމަށް ވަޒީރު ވިދާޅުވިއެވެ.
އޮސްޓްރޭލިއާގެ ބޮޑުވަޒީރުގެ ނައިބު އަދި ޑިފެންސް މިނިސްޓަރު ރިޗާޑް މާލްސް ރާއްޖެއަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ބަންޑާރަ ކޮށީގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަޒީރު ޣައްސާން ވިދާޅުވީ، “މި އުޅަނދު ބަނުމުގެ މަސައްކަތްތައް މިހާރު ދަނީ ކުރަމުން. ކަނޑުގެ އަސްކަރިއްޔާގެ ކުރިއެރުމަށް ބޮޑު އެހީއަކަށް މިކަންވާނެ. އަދި މި ދާއިރާން ސަރުކާރުން ކުރާ މަސައްކަތްތަކަށް ބޮޑު ބާރަކަށް ވާނެ” ކަމަށެވެ.
އޮސްޓްރޭލިއާގެ ޑިފެންސް މިނިސްޓަރު ރިޗާޑް މާލްސް ވިދާޅުވެފައިވަނީ އިންޑިއާ ކަނޑުގެ ސަލާމަތާއި ރައްކާތެރިކަމަކީ އޮސްޓްރޭލިއާއަށްވެސް މުހިންމު ކަމެއް ކަމަށާއި ރާއްޖެއާއި އޮސްޓްރޭލިއާގެ ގުޅުން ބަދަހިވެގެންދިއުމަކީ ލިބޭ ބޮޑު އުފަލެއް ކަމަށެވެ. އަދި ރާއްޖޭގައި އޮސްޓްރޭލިއާގެ ސަފީރެއް ހުންނެވުމަކީ ވެސް ދެ ގައުމުގެ ގުޅުން ރަމްޒުކޮށްދޭ ކަމެއްކަމުގައި ވަޒީރު ޣައްސާން ފާހަގަކުރެއްވިއެވެ.
މި ހަދިޔާއާ ގުޅިގެން، ރާއްޖޭގެ ކަނޑުގެ ސަރަޙައްދު ބެލެހެއްޓުމުގެ ގާބިލުކަން އިތުރުވެ، ކަނޑުގެ ވަސީލަތްތައް ރައްކާތެރިކުރުމަށް އިތުރު ބާރެއް ލިބިގެންދާނެ ކަމަށް ވަޒީރު ވިދާޅުވިއެވެ. އަދި “މި އުޅަނދު ލިބުމުން، ރާއްޖޭގެ ކަނޑުގެ ސަރަހައްދުގައި ދިމާވާ ކުއްލި ނުރައްކަލުގެ ހާލަތްތަކުގައި އަވަސް އަދި ހަރުދަނާ ފިޔަވަޅުތައް އެޅުމަށް އިތުރު ބާރެއް ލިބިގެންދާނެ. މިއީ ރާއްޖޭގެ ގައުމީ ސަލާމަތަށް ލިބޭ ވަރަށް މުހިންމު ކުރިއެރުމެއް” ކަމަށް ވަޒީރު ވިދާޅުވިއެވެ.