އޮސްޓްރޭލިއާގެ ބޮޑުވަޒީރުގެ ނައިބު އަދި ދިފާޢީ ވަޒީރު ރިޗަރޑް މާލްސް އެމްޕީ، ހުކުރު މިސްކިތަށް ޒިޔާރަތްކުރައްވާ އެ ތަނުގެ ތަރީޚު ބައްލަވާލައްވައިފިއެވެ.
މި ވަފުދު ކުރެއްވި ޒިޔާރަތުގައި ވަފުދުގެ ބޭފުޅުންނަށް މަރުޙަބާ ވިދާޅުވެ ހުކުރު މިސްކިތުގެ ޒިޔާރަތުގައި ވަފުދުގެ ބޭފުޅުންގެ އަރިހުގައި ބަހާ ބެހޭ ވަޒީރު އާދަމް ނަޞީރު އިބްރާހީމް ބައިވެރިވެވަޑައިގެންނެވިއެވެ.
މި ޒިޔާރަތުގައި އޮނޮރަބްލް ރިޗަރޑް މާލްސް އެމްޕީ ވަނީ ހުކުރު މިސްކިތުގެ ތާރީޚާ ބެހޭ ގޮތުން މަޢުލޫމާތު ސާފު ކުރައްވައި، ދިވެހި ރާއްޖޭގެ ފަންނީ ތާރީޚުގައި މި ބިނާގެ މުހިންމުކަމާ ބެހޭ ގޮތުން މައުލޫމާތު ހޯއްދަވާފައެވެ.
ޒިޔާރަތް ނިންމަވާލައްވަމުން، މި ޒިޔާރަތުގެ ހަނދަނީ ރަމްޒެއްގެ ގޮތުން ވަޒީރު އާދަމް ނަޞީރު އިބްރާހީމް ވަނީ އޮނޮރަބަލް ރިޗަރޑް މާލްސް އެމްޕީ އަށް، ދިވެހިރާއްޖޭގެ ހިރިގަލުގެ މިސްކިތްތަކާއި ބެހޭ މަޢުލޫމާތު ހިމެނޭ ފޮތެއް ހަދިޔާ ކުރައްވާފައެވެ. ހަމަ އެހެންމެ ދިވެހީންގެ ތަރިކައާއި އަސްލުވަންތަކަން އިއާދަކޮށް ދެމެހެއްޓުމުގައި ޢިއްޒަތްތެރި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އާ ތަޞަވުރުގައި ދެވޭ ޚާއްޞަ އިސްކަން ފާހަގަކުރެއްވިއެވެ.
ހުކުރު މިސްކިތަށް އެ މަނިކުފާނު މި ކުރެއްވި ޒިޔާރަތަކީ ދިވެހި ރާއްޖޭގެ ޤައުމީ ދިފާޢީ ބާރުގެ ޤާބިލްކަން އިތުރުކުރެއްވުމަށް ޢިއްޒަތްތެރި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރައްވަމުންގެންދަވާ މަސައްކަތްޕުޅަށް އެހީތެރިކަން ލިބޭނެ ބައެއް އެއްބަސްވުންތަކުގައި ދެ ފަރާތުން ސޮއިކުރެއްވުމަށް ފަހު، ދިވެހީންގެ ތަރިކައިގެ ބައެއް އަސަރުތައް ބައްލަވައިލެއްވުމަށް ކުރެއްވި ޒިޔާރަތެކެވެ. އެމަނިކުފާނުގެ އަރިހުގައި ދިފާޢީ ވަޒީރު ޣައްސާން މައުމޫނާއި ޗީފް އޮފް ޑިފެންސް ފޯސް މެޖަރ ޖެނެރަލް އިބްރާހީމް ޙިލްމީއާއި ދިފާއީ ދާއިރާގެ އިސް ބައެއް މަސްއޫލުވެރިން ބައިވެރިވެވަޑައިގަތެވެ.