ދިވެހި ފުލުހުންގެ ހިދުމަތް ހިމެނޭގޮތަށް ހަތް ގައުމަކުން ގުޅިގެން ކުރިއަށް ގެންދިޔަ އޮޕަރޭޝަނެއްގައި، 225 މިލިއަން ޑޮލަރުގެ ސްކޭމް ހިންގި 1،800 އަށްވުރެ ގިނަ މީހުން ހޯދައި ހުއްޓުވާލައިފިއެވެ.
ހޮންގް ކޮންގް ޕޮލިސް ފޯސް (އެޗްކޭޕީއެފް) އިން އިސްނަގައިގެން ކުރިއަށް ގެންދިޔަ މި ޖޮއިންޓް އޮޕަރޭޝަނުގައި ދިވެހިރާއްޖެ، ހޮންގް ކޮންގް، މަކާއޯ، މެލޭޝިއާ، ސިންގަޕޫރު، ސައުތު ކޮރެއާ އަދި ތައިލޭންޑް ހިމެނެއެވެ. އެޕްރީލް 28 އިން ފެށިގެން އެއް މަސް ދުވަހުގެ މުއްދަތަށް ކުރިއަށް ގެންދިޔަ މި އޮޕަރޭޝަންގައި 1،858 މީހުން ވަނީ ހައްޔަރުކޮށްފައެވެ.
އެޗްކޭޕީއެފް އިން ބުނާ ގޮތުގައި މި އޮޕަރޭޝަންގައި އޮންލައިން ޝޮޕިން ސްކޭމް، ޓެލެފޯން އޮޅުވާލުމާއި އިންވެސްޓްމަންޓް ހިޔާނާތާއި ކުލީގެ ހިޔާނާތާއި ވަޒީފާގެ ހިޔާނާތް ފަދަ 9،268 ހިޔާނާތުގެ މައްސަލަ ހިމެނެއެވެ. މި މައްސަލަތަކުގައި ޖުމްލަ 32،607 ބޭންކް އެކައުންޓް ފްރީޒްކޮށް، ގާތްގަނޑަކަށް 20 މިލިއަން ޑޮލަރުގެ މަކަރާއި ހީލަތުގެ ފައިސާ އަތުލައިގަނެފައިވެއެވެ.
މި އޮޕަރޭޝަންގެ އެއް ކާމިޔާބީގެ ގޮތުގައި، ސިންގަޕޫރުގެ އެންޓި-ސްކޭމް އޮތޯރިޓީތަކާއި ހޮންގް ކޮންގް ޕޮލިސްގެ ގުޅިގެންވާ މަސައްކަތުން، ސިންގަޕޫރުގެ އެއް ފަރާތަކުން ހޮންގް ކޮންގްގެ ބޭންކް އެކައުންޓުތަކަކަށް ޓްރާންސްފާކުރި 500,000 ޑޮލަރާ ގާތްކުރާ އަދަދެއްގެ ފައިސާ ވަނީ ހުއްޓުވާލެވިފައެވެ.
ހޮންގް ކޮންގްގެ ކޮމާޝަލް ކްރައިމް ބިއުރޯގެ ޗީފް ސުޕްރިންޓެންޑެންޓް ވޮންގް ޗުން ޔޫ ވިދާޅުވި ގޮތުގައި، "ސްކޭމް ކުރުމުގައި އެކި ސަރަހައްދުތަކުގައި އެއްވައްތަރެއްގެ އުކުޅުތަކެއް ގެންގުޅޭކަން މި އޮޕަރޭޝަންގެ ތެރެއިން ފާހަގަވެފައިވެއެވެ."
ދިވެހިރާއްޖޭގައި ވެސް ސްކޭމްގެ މައްސަލަތައް ވަނީ އިތުރުވެފައެވެ. ދިވެހި ފުލުހުންގެ ހިދުމަތުން ހާމަކުރި ގޮތުގައި މިދިޔަ ދެމަހެއްހާ ދުވަހުގެ ތެރޭގައި އެކަނި ވެސް މަކަރާއި ހީލަތް ހަދައިގެން ހިންގި ސްކޭމްތަކުގައި 2.5 މިލިއަން ރުފިޔާ ގެއްލިފައިވެއެވެ.