ބިދޭސީން އިމިގްރޭޝަންގެ ޤަވާއިދުތަކާއި އެއްގޮތަށް އަމަލުކުރާކަން ކަށަވަރުކުރުމަށް ބިދޭސީން ބައިވެރިކޮށްގެން މޮނިޓަރިންގެ ހަރަކާތެއް މޯލްޑިވްސް އިމިގްރޭޝަނުން ކުރިއަށް ގެންގޮސްފިއެވެ.
މާލޭގެ އާޓިފިޝަލް ބީޗްގައި ކުރިއަށް ގެންދިޔަ މި ހަރަކާތަކީ ބިދޭސީން އިމިގްރޭޝަންގެ ޤަވާއިދުތަކާއި އެއްގޮތަށް އަމަލުކުރާކަން ކަށަވަރުކުރުމަށް އަޅާފައިވާ ފިޔަވަޅުތަކުގެ ތެރޭގައި ހިމެނޭ މަސައްކަތްތަކެއް ކަމަށް އިމިގްރޭޝަނުން ވިދާޅުވެފައިވެއެވެ.
ގަވާއިދާ ހިލާފަށް އުޅޭ ބިދޭސީން ހޯދައި އެ މީހުން ޑީޕޯޓްކުރުމުގެ މަސައްކަތް އިމިގްރޭޝަނުން ކުރަމުން އަންނައިރު، މި އަހަރުގެ ތެރޭގައި ހިންގި ރެއިޑް އޮޕަރޭޝަންތަކުގައި މިހާތަނަށް 100 އަށްވުރެ ގިނަ ބިދޭސީން ވަނީ ހައްޔަރުކޮށްފައެވެ.
ގަވާއިދާ ހިލާފަށް ރާއްޖޭގައި އުޅޭ ބިދޭސީން މޮނިޓަރކުރުމަށް އިމިގްރޭޝަނުން ކުރަމުންދާ މަސައްކަތްތަކުގެ ތެރެއިން، މާލެ އާއި ރާއްޖޭގެ އެކި ކަންކޮޅުތަކުގައި އިމިގްރޭޝަނުން އަންނަނީ ހާއްސަ އޮޕަރޭޝަންތަކެއް ހިންގަމުންނެވެ.