އަވަށްޓެރި ބައެއް ގައުމުތަކުގައި މިދުވަސްވަރު ހަލުވިކަމާއެކު ޗިކުންގުންޔާ ފެތުރެމުންދާތީ، ކުރިއަށް އޮތް އީދު ބަންދުގައި އެފަދަ ގައުމުތަކަށް ދަތުރުކުރާ ފަރާތްތަކުން އެކަމަށް ސަމާލުވުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އިލްތިމާސް ކޮށްފިއެވެ.
އެޗްޕީއޭއިން ދެއްވި މައުލޫމާތުގައި، ދަތުރުފަތުރުކުރާއިރު މަދިރި ހެފުމުން ރައްކާތެރިވުމަށް ޚާއްސަ ސަމާލުކަމެއް ދިނުމަށް އިރުޝާދު ދެއްވާފައިވެއެވެ. މިގޮތުން،
- ބޭރަށް ނުކުންނައިރު މަދިރި ލޯޝަން ނުވަތަ މަދިރި ސްޕްރޭ ބޭނުންކުރުން،
- ވީހާވެސް ބޮޑަށް ހަށިގަނޑު ނިވާވާގޮތަށް ހެދުން އެޅުން
މީގެއިތުރުން، ދިރިއުޅޭ ތަންތަނުގައި މަދިރިން ރައްކާތެރިވުމަށް އަޅަންޖެހޭ ފިޔަވަޅުތަކުގެ ތެރޭގައި
- ކުޑަދޮރުފަދަ ތަންތާނގައި މަދިރި ދާޖެހުމާއި،
- ގޭތެރޭގައި މަދިރިގެ ބޭނުންކުރުމާއި
- މަދިރި ގިނަވާ ވަގުތުތަކުގައި ގޭގޭގެ ދޮރާއި ކުޑަދޮރުތައް ލައްޕާފައި ބެހެއްޓުމަށް އެޗްޕީއޭއިން ވަނީ އާންމުންނަށް އިލްތިމާސްކޮށްފައެވެ.
މަދިރި އާލާވިޔަ ނުދިނުމަށްޓަކައި އަޅަންޖެހޭ ފިޔަވަޅުތަކުގެ ތެރޭގައި
- ގެއާއި ގޯތިތެރޭގައި ފެން ހަރުލާގޮތަށް ހުންނަ ތަންތަނާއި، ހުސް ތާނގީ ފަދަ ތަކެތި ފެން ނޭޅޭގޮތަށް ބެހެއްޓުން ހިމެނެއެވެ.
- އާންމު ތަންތަނާއި މަގުމަތީގައި އަދި ކޮންސްޓްރަކްޝަން ސައިޓްތަކުގައި ފެން ހަރުލާގޮތަށް ހުންނަ ހުސްފުޅި އާއި ދަޅު ފަދަ ތަކެތި ނައްތާލުމަށާއި،
- މަދިރި ފަނި ނައްތާލުމަށް ބީ.ޓީ.އައި ނުވަތަ ޓެމިފޯސް ބޭނުންކުރުމަށްވެސް އެޗްޕީއޭއިން ވަނީ އިރުޝާދު ދެއްވާފައެވެ.
އެޗްޕީއޭއިން ފާހަގަކުރައްވާގޮތުގައި ހުރިހާ ވައްތަރެއްގެ މަދިރިވެސް އެންމެ ގިނަވަނީ ހެނދުނާއި ހަވީރުގެ ވަގުތުތަކުގައެވެ. ޚާއްސަކޮށް އީޑިސް މަދިރި އާންމުކޮށް ހަފަނީ ދުވާލު ގަޑީގައެވެ. ސާފު ފެން ހަރުލާ ކޮންމެ ތަނެއްގައި އީޑީސް މަދިރީގެ ބިސް އާލާވެއެވެ. މި މަދިރި ފަނި އަޅާފައި ހުންނަ ތަކެތީގެ ފެން ހުސްކުރިޔަސް، އެތަކެތީގައި މަދިރި ބިސް ހަރުލާފައި ހުންނާނެއެވެ.
އެހެންކަމުން ހުރިހާ ވަގުތުތަކުގައިވެސް މަދިރި ހެފުމުންނާއި މަދިރި އާލާވާ ތަންތަނާއި ތަކެތި ނައްތާލުމަށް އެޗްޕީއޭއިން އިލްތިމާސްކުރައްވައެވެ.