ހުޅުމާލެ ދެވަނަ ފިޔަވަހީގައި މިއަންނަ އަހަރު އަލަށް ހުޅުވާ ސްކޫލަށް މާލެ ސަރަހައްދުން ވަންނަން ބޭނުންވާ ދަރިވަރުންގެ މައުލޫމާތު އެއްކުރަން އެޑިއުކޭޝަން މިނިސްޓްރީން މި މަހުގެ އެއްވަނަ ދުވަހުން ފެށިގެން ފަށައިފިއެވެ. މި ސްކޫލަށް ވަންނަން ބޭނުންވާ ދަރިވަރުންގެ ފަރާތުން ފޯމު ފުރުމުގެ ސުންގަޑިއަކީ މި މަހުގެ 15 ވަނަ ދުވަހެވެ.
އެޑިއުކޭޝަން މިނިސްޓްރީން މައުލޫމާތު ދެއްވާފައިވާ ގޮތުގައި މިހާރު ހުޅުމާލޭ ސްކޫލުތަކުން ޖާގަ ނުލިބިގެން މާލޭގެ ސްކޫލުތަކަށް 900 އަށްވުރެ ގިނަ ދަރިވަރުން ދަތުރުކުރަމުންދެއެވެ. އަދި ހުޅުމާލެ ފޭސް 2 ގެ ސްކޫލުތަކުން ޖާގަ ނުލިބިގެން ފޭސް 1 ގެ ސްކޫލުތަކުގައި 300 ދަރިވަރުން ތައުލީމު ހާސިލުކުރަމުން ގެންދެއެވެ.
އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެފައިވާ ގޮތުގައި މި އަހަރުގެ ނޮވެންބަރު މަހުގެ ނިޔަލަށް އަލަށް ހުޅުވާ ސްކޫލުގެ މަސައްކަތް ނިމޭނެއެވެ. ޒަމާނީ ވަސީލަތްތަކާއެކު އިމާރާތްކުރާ މި ސްކޫލަކީ އޭސީ ކުރެވިފައިވާ ސްކޫލެކެވެ.
އެއްދަންފަޅިއަށް ހިންގަން ނިންމާފައިވާ މި ސްކޫލުގައި 1500 ދަރިވަރުންގެ ޖާގައިގެ 54 ކްލާސްރޫމް ހުންނާނެއެވެ. ދަރިވަރުން ގިނަވެއްޖެ ހާލަތެއްގައި، ދެ ދަންފަޅިއަށް ބަދަލުކޮށް، ވީހާވެސް ގިނަ ދަރިވަރުންނަށް ގެއާ ކައިރި ސްކޫލަކަށް ދިއުމުގެ ފުރުސަތު ދިނުމަށް މިނިސްޓްރީން ވަނީ ނިންމާފައެވެ.
މިހާރު އެއްކުރެވޭ މައުލޫމާތުގެ މައްޗަށް ބިނާކޮށް ސްކޫލް އެންރޯލްމެންޓް ޕްރޮޖެކްޝަން ހެދުމަށްފަހު، ދަންފަޅިތައް ތަރުތީބުކުރާނެ ކަމަށް މިނިސްޓްރީން މައުލޫމާތު ދެއްވާފައިވެއެވެ. އަދި މައުލޫމާތު އެއްކުރުމުގެ މުއްދަތު މި މަހުގެ 15 ވަނަ ދުވަހު ހަމަވާތީ، ސުންގަޑި ހަމަވުމުގެ ކުރިން ފޯމު ފުރުމަށް އެޑިއުކޭޝަން މިނިސްޓްރީން ވަނީ އިލްތިމާސްކޮށްފައެވެ.