ހެނދުނު ހޭލާއިރު އަނގައިން ނުބައިވަސް ދުވުމަކީ ގިނަ ބަޔަކަށް ދިމާވާ އާންމު މައްސަލައެކެވެ. މިކަން މެދުވެރިވަނީ ނިދާފައި އޮންނައިރު އަނގައިގައި ކުޅު އުފެދޭ މިންވަރު މަދުވެ، އަނގަ ހިކި، ބެކްޓީރިއާ އާލާވެ، ނުބައިވަސްދުވާ މާއްދާތައް އުފެދުމުގެ ސަބަބުންނެވެ.
އަނގައިން ނުބައިވަސް ދުވުމަށް މެދުވެރިވާ ސަބަބުތައް؛
އަނގަ ހިކުން: ކުޅުގެ ސަބަބުން ކާތަކެތީގެ ބައިތަކާއި ބެކްޓީރިއާ ދޮވެވި ސާފުވެއެވެ. ނަމަވެސް ނިދާފައި އޮންނައިރު ކުޅު މަދުވުމުގެ ސަބަބުން ބެކްޓީރިއާ އިތުރުވެ، ކާތަކެތި ހަޖަމުވެ ނުބައިވަސްދުވާ މާއްދާތައް އުފެދެއެވެ.
އަނގަ ހުޅުވައިގެން ނިދުން: މިގޮތަށް ނިދުމުން އަނގަ އިތުރަށް ހިކި، ބެކްޓީރިއާ އާލާވުމަށް މަގުފަހިވެއެވެ. ބެކްޓީރިއާ އިތުރުވެ، "ވޮލަޓައިލް ސަލްފަރ ކޮމްޕައުންޑް" ކިޔާ މާއްދާ އުފެދެއެވެ. މިއީ އަނގައިން ނުބައިވަސް ދުވުމަށް މެދުވެރިވާ މައިގަނޑު މާއްދާއެވެ.
ކާތަކެތީގެ ބައިތައް: ރޭގަނޑު ނިދަން ދިއުމުގެ ކުރިން އަނގައިގައި ހުންނަ ކާތަކެތީގެ ބައިތައް ބެކްޓީރިއާއިން ހަޖަމުކޮށް، ނުބައިވަސްދުވާ މާއްދާތައް އުފައްދައެވެ.
އަނގައިގެ ސާފުތާހިރުކަން ކުޑަވުން: ގަވާއިދުން ދަތް އުނގުޅައި، ފްލޮސް ނުކުރުމުގެ ސަބަބުން ބެކްޓީރިއާ އިތުރުވެ، ހެނދުނު ހޭލާއިރު އަނގައިން ނުބައިވަސް ދުވުމަށް މެދުވެރިވެއެވެ.
މިކަން ހުއްޓުވުމަށް އެޅިދާނެ ފިޔަވަޅުތައް
- ދަތާއި ދޫ ސާފުކުރުން: ނިދަން ދިއުމުގެ ކުރިން ދަތް އުނގުޅައި، ދޫ ސާފުކުރުމުން ކާތަކެއްޗާއި ބެކްޓީރިއާ ނައްތާލެވޭނެއެވެ.
- ފްލޮސް ކުރުން: ދަތުގެ ދޭތެރެއިން ކާތަކެއްޗާއި ޕްލާކް ނައްތާލުމަށް ފްލޮސް ކުރަންވާނެއެވެ.
- އެންޓިބެކްޓީރިއަލް މައުތްވޮޝް: ބެކްޓީރިއާ މަރައި، އަނގަ ތާޒާކުރުމަށް މައުތްވޮޝް ބޭނުންކުރެވިދާނެއެވެ.
- ފެން ބުއިން: ދުވާލުގެ ވަގުތުތަކުގައި އަދި ޚާއްޞަކޮށް ނިދަން ދިއުމުގެ ކުރިން ފެން ބުއިމުން އަނގަ ހިކުން ކުޑަކުރެވޭނެއެވެ.
- ގަދަ ވަސްދުވާ ކާތަކެތި މަދުކުރުން: ނިދަން ދިއުމުގެ ކުރިން ލޮނުމެދު، ފިޔާ ފަދަ ވަރުގަދަ ވަސްދުވާ ތަކެތި ކެއުން މަދުކުރަންވާނެއެވެ.
- ދުންފަތުގެ އިސްތިޢުމާލު ހުއްޓާލުން: ދުންފަތުގެ އިސްތިޢުމާލުކުރުމުން އަނގަ ހިކުމާއި ހިރުގަނޑުގެ ބަލިތަކަށް މަގުފަހިވެއެވެ.
- ދަތުގެ ޑޮކްޓަރަށް ދެއްކުން: ގަވާއިދުން ދަތުގެ ޑޮކްޓަރަށް ދައްކައި، އަނގައިގެ ސާފުތާހިރުކަމާ ބެހޭ ލަފާ ހޯދަންވާނެއެވެ.
ސިއްޙީ ނުރައްކާތައް: އަނގައިން ނުބައިވަސް ދުވުމަކީ ހަމައެކަނި އިޖްތިމާޢީ ގޮތުން ދިމާވާ އުނދަގުލެއް ނޫނެވެ. މިއީ ޖިންޖަވައިޓިސް، ޕެރިއޮޑޮންޓިސް އަދި އެއަށްވުރެ ނުރައްކާތެރި ހިތުގެ ބަލިތަކާއި ސްޓްރޯކް ޖެހުމުގެ ފުރުސަތު އޮތްކަން ދައްކުވައިދޭ އަލާމާތަކަށް ވެސް ވެދާނެއެވެ. އަދި މީގެ އިތުރުން، އަނގޭގައި އުފެދޭ ވިހަ މާއްދާތަކާއި އަލްޒައިމަރ އަދި އަނގައިގެ ކެންސަރާ ދެމެދުވެސް ގުޅުމެއް ހުރެދާނެ ކަމަށް ޞިއްޙީ މާހިރުން ފާހަގަކުރެއެވެ.
މައްސަލަ ހައްލުކުރުމަށް އެޅިދާނެ ފިޔަވަޅުތައް؛ މި މައްސަލަ ހައްލުކުރުމަށް އެޅިދާނެ މުހިންމު ފިޔަވަޅުތަކުގެ ތެރޭގައި:
- ގަވާއިދުން، ޚާއްޞަކޮށް ނިދަން ދިއުމުގެ ކުރިން ދަތް އުނގުޅުން
- ދަތުގެ ދޭތެރެތައް ރަނގަޅަށް ސާފުކުރުން
- ދޫ ސާފުކުރުމަށް ޚާއްޞަ ސަމާލުކަމެއް ދިނުން، ދަތް އުނގުޅައި ނިމިގެން ދޫ ސާފުކުރުން
- އަނގައިގެ ސާފުތާހިރުކަން ބެލެހެއްޓުން
- ފެން ގިނައިން ބުއިމުން އަނގަ ހިކުން ކުޑަކުރުން
- ޑޮކްޓަރީ އެހީގެ މުހިންމުކަން
މި މައްސަލަ ދިގު މުއްދަތަކަށް ދެމިގެންދާނަމަ، ނުވަތަ އާދަޔާ ޚިލާފަށް ބޮޑަށް ތަޖުރިބާކުރެވޭނަމަ ދަތުގެ ޑޮކްޓަރަކަށް ދެއްކުން މުހިންމެވެ. އެއީ މިކަމުގެ ފަހަތުގައި އިތުރު ސިއްޙީ މައްސަލައެއް އޮތްތޯ ބެލުމަށާއި، އެކަށީގެންވާ ފަރުވާއެއް ހޯދުމަށްޓަކައެވެ. ހެނދުނު ހޭލާއިރު އަނގައިން ނުބައިވަސް ދުވުމަކީ ޤުދުރަތީ ކަމެއް ނަމަވެސް، ރަނގަޅު އާދަތަކެއް އަށަގަންނަވައިގެން މިކަން ކޮންޓްރޯލް ކުރެވިދާނެއެވެ. އަނގައިގެ ސާފުތާހިރުކަމަށް އަހައްމިއްޔަތުކަން ދީ، މަތީގައިވާ ފިޔަވަޅުތައް އެޅުމުން މިކަމުގެ އުނދަގޫ ވަރަށް ބޮޑަށް ކުޑަކުރެވޭނެއެވެ.