މިއަހަރުގެ ހައްޖު ހުތުބާގައި އިސްލާމީ އުންމަތަށް މާތްﷲއަށް ހެޔޮގޮތުގައި ތަގުވާވެރިވުމަށް ގޮވާލައްވައި، މުސްލިމް ވެރިންނަށް ހިދާޔަތާއި ތެދުމަގު ދެއްކެވުމަށް ދުޢާ ދަންނަވައިފިއެވެ.
މިއަހަރުގެ ހައްޖު ހުތުބާ ދެއްވީ ޝެއިޚް ސަލާހް އަލް ހުމައިދެވެ. ހަމްދު ސަލަވާތަށްފަހު ހުތުބާ ފެއްޓެވުމާއެކު، ހެޔޮ ނިޔަތަކާއެކު މާތްﷲއަށް ތަގުވާވެރިވުމަށް އިސްލާމީ އުންމަތަށް ގޮވާލެއްވިއެވެ. އަދި އިސްލާމީ އުންމަތަށް ދީނުގެ އަސާސްތައް ހަނދާންކޮށްދެއްވިއެވެ. ހުތުބާގައި ފާހަގަކުރެއްވި ގޮތުގައި އިސްލާމްދީން ބެހިގެންވާ ދަރަޖަތަކުގެ ތެރެއިން އެންމެ މަތިވެރި ދަރަޖައަކީ އިހުސާންތެރިކަމެވެ. އަދި ނަމާދާއި، ރޯދަ ހިފުމާއި ޒަކާތްދިނުންފަދަ ދީނުގެ ރުކުންތަކަށް ރައްކާތެރިވެ އެކަންކަން އިޚްލާޞްތެރި ހިތަކާއެކު ކުރުމަށް އިލްތިމާސްކުރެއްވިއެވެ.
މާތްﷲއަށް އަޅުކަން ކުރާ ވަގުތު، އެމީހެއްގެ ޢަމަލުތައް ބައްލަވާވޮޑިގެންވާކަން ހަނދާންކޮށް ﷲއަށް ބިރުވެތިވާ ހާލު ނަމާދުކުރުމަށާއި، ނަމާދަށް މިސްކިތުގެ ޖަމާޢަތުގައި ބައިވެރިވުމަކީ އެކުވެރިކަމާއި މުޖުތަމަޢުގެ ބަދަހިކަން އާލާވާ ކަމެއްކަން ވެސް ހުތުބާގައި ފާހަގަކުރެއްވިއެވެ. އަދި، މާތްﷲގެ އެންމެހާ އެންގެވުންތަކަށް ކިޔަމަންވުމަށާއި، ކަމަކާމެދު ޚިލާފުވާ ހާލަތުގައި ޢަމަލުކުރަން ޖެހޭނެ ގޮތަކީ ރަސޫލާ އެކަމެއް ކުރުމަށް އަންގަވާފައިވާ ގޮތެއްގެ މަތިން ކަމަށް ވެސް ހުތުބާގައި ފާހަގަކުރެއްވިއެވެ.
އޭގެފަހުން، ކުޅަދާނަވެގެންވާ މީހުން މާތްﷲގެ ގެފުޅަށް ގޮސް ޙައްޖުވުމުގެ މާތްކަން ވެސް ހުތުބާގައި ފާހަގަކުރެއްވިއެވެ. ޙައްޖުގެ އަޅުކަން އަދާކުރެއްވުމުގައި ރަސޫލާ ކަންކުރެއްވި ގޮތަށް ވެސް ހުތުބާގައި އަލިއަޅުއްވާލެއްވިއެވެ. އެގޮތުން ވިދާޅުވީ:
- ދުޢާ ކުރެއްވުމާއި، ޒިކުރުކުރުން އަދި އަޅުކަންކުރުމުގައި ރަސޫލާ އިރުއޮއްސެންދެން ޢަރަފާތުގައި ހުންނެވި ކަމަށް
- އިރު އޮއްސުމުން މުޒްދަލިފާއަށް ވަޑައިގެން ރޭ ކުރެއްވި ކަމަށް
- އަދި މިނާއަށް ވަޑައިގެން ޖަމްރާއަށް ހިލައުއްކަވައި، ހަދްޔު ކަތިލައްވައި ހެއްދެވި ކަމަށް
- އޭގެފަހުން މިނާއަށް ވަޑައިގެން ކޮންމެ ދުވަހަކު ވެސް ހިލައުއްކަވާ ކަމަށް؛ ނަމަވެސް ދެ ދުވަސް ވުމަށްފަހު އަވަހަށް ދާން ބޭނުންވާ މީހުން މިނާއިން ނިކުތުން ހުއްދަވެގެންވާ ކަމަށް
ޙައްޖުވެރިންނަށް، ޙައްޖުގެ ކަންކަން ފަހިކޮށް ފަސޭހަކޮށްދިނުމަށް ގިނަ ކަންކަމެއް ސަޢޫދީގެ ސަރުކާރުން ކުރައްވާފައިވާ ކަމަށާއި، އެއީ ވަރަށް ބުރަ ގިނަ މަސައްކަތްތަކެއް ކަން ވެސް ހުތުބާގައި ފާހަގަކުރެއްވިއެވެ.
ޣައްޒާގައި ހިނގަމުންދާ ޤަތުލުޢާންމުތަކުގައި ޝަހީދުވެފައިވާ މީހުންނާއި، އެރަށުގެ ރައްޔިތުންނަށް ރަޙުމަތްލައްވާ ކަންކަން ލުއިކޮށްދެއްވުމާއެކު އަދުއްވުންގެ ނުރައްކަލުންނާއި، އެމީހުންގެ ކިބައިން އަމާންކަން ދެއްވުމަށް މިއަދުގެ ހުތުބާގައި ދުޢާ ދެންނެވިއެވެ.
އަދި، މުސްލިމުންގެ ވެރިންނާއި، ސަޢޫދީގެ ވެރިންނަށް ވެސް ހިދާޔަތު ދައްކަވާ ތެދުމަގު ދެއްކެވުމަށް ވެސް މިއަދުގެ ހުތުބާގައި ދުޢާ ދެންނެވިއެވެ.
މި ހުތުބާގައި އިތުރަށް ދުޢާ ދެންނެވީ:
- އެންމެހާ މުސްލިމުންގެ ފާފަތައް ފުއްސަވާ ދެއްވައި ކަންކަން ލުއިކޮށްދެއްވައި ހިތްތައް އަލިކުރެއްވުމަށް
- އަނބިދަރިންގެ ޢަމަލުތައް ހެޔޮކޮށް އިޞްލާޙުކޮށްދެއްވައި ނަރަކައިން މިންޖުކުރެއްވުމަށް
- ހެޔޮ ޢަމަލުތައް ޤަބޫލުކުރައްވައި މާތްﷲ ހެޔޮގޮތުގައި އަޅުކަންކޮށް ޒިކުރުކުރެއްވުމަށް ވާގިވެރިވެވަޑައިގަތުމަށް
- އެންމެހާ ޙައްޖުވެރިންގެ ޙައްޖު ޤަބޫލުކޮށްދެއްވުމަށް
ޚުޠުބާއަށްފަހު، މެންދުރު އަދި ޢަޞުރު ނަމާދު ޤަޞްރުކޮށް ޖަމްޢުކޮށް ކުރާނެއެވެ. އޭގެފަހުން އިރުއޮއްސެންދެން ޙައްޖުވެރިން ޢަރަފާތުގައި ދެމިތިބޭނީ ދުޢާކުރުމާއި، ޒިކުރުކުރުންފަދަ އަޅުކަންތަކުގައެވެ. އިރުއޮއްސުމަށްފަހު، މުޒްދަލިފާއަށް ދިއުމަށް ޙައްޖުވެރިން ޢަރަފާތު ބިމުން ނިކުންނަން ފަށާނެއެވެ.