މިއަހަރުގެ އަޟްޙާ ޢީދު ފާހަގަކުރުމުގެ ގޮތުން “ޢީދުހަވީރު 1446” ގެ ނަމުގައި ގްރޭޓަރ މާލެ ސަރަހައްދުގައި ޤައުމީ ފެންވަރުގެ ހަރަކާތްތަކެއް ބޭއްވުމަށް ވަނީ ނިންމާފައެވެ. މި ހަރަކާތްތަކުގެ ތެރޭގައި ހުޅުމާލޭގައި ޢީދު ހުޅުޖެހުމާއި ވެދުމާއި ދިޔުން ފަދަ އާންމު ރައްޔިތުންގެ މެދުގައި މަޤްބޫލު ހަރަކާތްތައް ހިމެނެއެވެ.
މި ހަރަކާތްތައް ކުރިއަށްދާނީ މާލޭގެ ސަލްޓަން ޕާކް، ޖުމްހޫރީ މައިދާން އަދި ހުޅުމާލޭގެ ސެންޓްރަލް ޕާކާއި ހިޔާ ޕާކް ސަރަހައްދުގައެވެ. ތިން ދުވަހުގެ މުއްދަތަށް ކުރިއަށްދާ މި ހަރަކާތްތައް ހިނގާނީ ހަވީރު 4 އިން 6 އަށެވެ. އަދި ބައެއް ސްޓޯލްތައް ރޭގަނޑު 8:30 އާ ހަމައަށް ހުޅުވިފައި ހުންނާނެއެވެ.
ރައީސުލްޖުމްހޫރިއްޔާގެ އިސްނެންގެވުމާއެކު ރޭވިފައިވާ މި ހަރަކާތްތަކުގައި ރާއްޖޭގެ އިހުގެ ސަޤާފަތާއި ކުޅިވަރުތަކާއި، ޒަމާނީ ކެރެކްޓަރުތައް ދައްކާލުމަށް ވަނީ ހަމަޖެހިފައެވެ. ސިފައިންގެ ޚާއްސަ ހަރަކާތްތަކުގެ ތެރޭގައި ޔުނިފޯމްތަކާއި، ހަތިޔާރުތަކާއި، އުޅަނދުތައް ދެއްކުމާއި، ބޭންޑުގެ ހަރަކާތްތަކާއި، ފޯމްބާތް ޕޫލާއި ފެންކުޅީގެ ހަރަކާތްތައް ހިމެނެއެވެ.
އީދު ކުޅިވަރު ހަރަކާތްތަކުގެ ތާވަލް؛ އެޗްޑީސީން އާންމުކޮށްފައިވާ ތާވަލުގައިވާ ގޮތުން،
ޖޫން 5 ވަނަ ދުވަހު
- ރޭގަނޑު 8:30 ގައި ވެދުމާ ދިޔުމާއި
- އީދު ހުޅު އަދި ބޮޑުބެރުގެ ހަރަކާތްތައް ރުއްގަނޑު 1 ގައި ކުރިއަށްދާނެ
- ހުޅުމާލެ 2 ގެ ޗެނަލް ބީޗްގައި ރޭގަނޑު 9 ޖަހާއިރު ހަރަކާތްތައް ފެށޭނެ
ޖޫން 6 ވަނަ ދުވަހު
- އީދު ނަމާދަށްފަހު އުލްހިޔާ ކަތިލުމާއި
- އީދު ބޮނޑިބަތް ހުޅުމާލޭ ކްރިކެޓް ސްޓޭޑިއަމް ސަރަހައްދުގައި ކުރިއަށްދާނެ
މީގެއިތުރުން، ހުކުރު ދުވަހުން ފެށިގެން އާދިއްތަ ދުވަހުގެ ނިޔަލަށް ކުޑަކުދިންގެ ހަވީރުގެ ހަރަކާތްތައް ހުޅުމާލޭ ސެންޓްރަލް ޕާކު އަދި ހިޔާ ޕާކު ސަރަހައްދުގައި ކުރިއަށްދާނެއެވެ. މި ހަރަކާތްތައް އިންތިޒާމްކޮށްފައިވަނީ ސަރުކާރުގެ އެކި މުއައްސަސާތަކާއި ކުންފުނިތައް ގުޅިގެން، ހުރިހާ އުމުރުފުރައެއްގެ މީހުންނަށް ބައިވެރިވެވޭ ގޮތަށެވެ.