ގައުމީ އެއާލައިން މޯލްޑިވިއަންގެ ފްލީޓަށް އިތުރުކުރާ އޭޓީއާރު މަރުކާގެ ފަސް ވަނަ މަތިންދާބޯޓު ރާއްޖެ ގެނައުމަށް ފްރާންސްގެ ޓޫލޫޒްއިން މިއަދު ދަތުރު ފަށައިފިއެވެ.
މޯލްޑިވިއަން އިން މިއަދު “އެކްސް” ގައި ހިއްސާކުރި މައުލޫމާތުގައިވާ ގޮތުން، އޭޓީއާރު 600-42 މަރުކާގެ މި އައު މަތިންދާބޯޓު ރާއްޖެއަށް އައުމުގެ ކުރިން ގްރީސްގެ ހެރަކްލިއަން އާއި އިތުރު ދެ މަންޒިލަކަށް ޖައްސާނެއެވެ.
މޯލްޑިވިއަންގެ ފްލީޓަށް އިތުރުކުރާ މި ފަސްވަނަ އޭޓީއާރު މަތިންދާބޯޓު ރާއްޖެއަށް ގެންނަނީ، މީގެ އެއް އަހަރު ކުރިން ހަތަރުވަނަ އޭޓީއާރު މަތިންދާބޯޓު ރާއްޖެ ގެނެސް އެތެރޭގެ އުދުހުންތަކުގައި ބޭނުންކުރަން ފެށުމަށްފަހުގައެވެ.
އޭޓީއާރު މަރުކާގެ މަތިންދާބޯޓުތަކަކީ މެއިންޓެނަންސްގެ ހަރަދުތައް ވެސް ފުދޭވަރަކަށް ކުޑަ އުޅަނދުތަކެއް ކަމަށް މޯލްޑިވިއަން އިން ފާހަގަކުރެއެވެ. މި މަތިންދާބޯޓުތައް މޯލްޑިވިއަން އިން ބޭނުންކުރަމުން ދަނީ ހަމައެކަނި އެތެރޭގެ އުދުހުންތަކަށެވެ. އަދި ބޭރުގެ ދަތުރުތަކަށް ބޭނުންކުރަމުން ދަނީ އޭ320 މަރުކާގެ މަތިންދާބޯޓެވެ.
މޯލްޑިވިއަންގެ ފްލީޓަށް އިތުރުކުރާ މި އައު މަތިންދާބޯޓާއެކު، އެއާލައިންގެ އޭޓީއާރު މަރުކާގެ މަތިންދާބޯޓުތަކުގެ އަދަދު ފަހަކަށް އަރާނެއެވެ.