ލ. ގަމު ލިންކް ރޯޑުގައި މިއަދު ހަވީރު ހިނގި ނުރައްކާތެރި އެކްސިޑެންޓެއްގައި ސައިކަލެއްގައި ދިޔަ ދެ މީހަކަށް ބޮޑެތި އަނިޔާތަކެއް ވެއްޖެއެވެ. މި އެކްސިޑެންޓް ހިނގާފައިވަނީ އުތުރުން ދެކުނަށް ދުއްވަމުން ދިޔަ ސައިކަލަކާއި ކާރެއް ޖެހިގެންނެވެ.
ރޭ މީޑިއާތަކަށް ފޮނުވި މެސެޖެއްގައި ފުލުހުން ބުނީ ލާމު ގަމު ލިންކް ރޯޑުގައި އުތުރުން ދެކުނަށް ދުއްވާފައި ދިޔަ ސައިކަލަކާއި ކާރެއް ޖެހި އެކްސިޑެންޓް ވެފައިވާ މައްސަލަ ރޭ 19:03 އެހައިކަންހާއިރު ފުލުހުންނަށް ރިޕޯޓް ކޮށްފައިވާ ކަމަށެވެ. މި އެކްސިޑެންޓްގައި ސައިކަލުގައި ތިބި ދެ މީހުންނަށް އެކި ވަރުގެ އަނިޔާވެފައިވާ ކަމަށްވެސް ފުލުހުން ވަނީ ބުނެފައެވެ. ސައިކަލުގައި ތިބީ 44 އަހަރުގެ ދެ ފިރިހެނުން ކަމަށާއި ކާރުގައި އިނީ ކާރު ދުއްވަން އިން މީހާ އެކަނި ކަމަށް ފުލުހުން ބުންޏެވެ. ކާރު ދުއްވަން އިނީ 62 އަހަރުގެ މީހެއްކަމަށް ފުލުހުން ވަނީ ބުނެފައެވެ.
އެގޮތުން އެކްސިޑެންޓްގައި ސައިކަލު ދުއްވަމުން ދިޔަ 44 އަހަރުގެ ދިވެހި ފިރިހެން މީހާގެ ކަނާތު ފައިގެ ދެ ތަނަކުން ބިނދި ބޮޑެތި އަނިޔާތަކެއް ވެފައިވާ ކަމަށާއި މީގެއިތުރުން، ސައިކަލުގައި ފަހަތުގައި އިން 44 އަހަރުގެ ދިވެހި ފިރިހެން މީހާގެ ބޮލުގެ ދެ ތަނަކުން ފެޅި، ކަނާތު ފައިގެ ދެ ތަނަކުން ބިނދި، އިތުރު އަނިޔާތަކެއް ވެފައިވާކަމަށް ފުލުހުން މައުލޫމާތު ދީފައިވެއެވެ. ނަމަވެސް، އެކްސިޑެންޓްގައި ހިމެނޭ ކާރު ދުއްވި 62 އަހަރުގެ ދިވެހި ފިރިހެން މީހާއަށް އެއްވެސް އަނިޔާއެއް ވެފައި ނުވާ ކަމަށް ފުލުހުން ވަނީ ބުނެފައެވެ.
މި އެކްސިޑެންޓްގައި ދެ އުޅަނދަށްވެސް ވަނީ އެކި ވަރުގެ ގެއްލުން ލިބިފައި ކަމަށް ފުލުހުން ވަނީ ބުނެފައެވެ.
ފުލުހުން ދަނީ މިމައްސަލަ އިތުރަށް ތަހުގީގު ކުރަމުންނެވެ.