ދޮށީގެ މަސްވެރިކަމުގައި ހަރަކާތްތެރިވާ ފަރާތްތަކަށް އަމާޒުކޮށްގެން "މޯލްޑިވްސް ޓޫނާ ރޭސް 2025" ގެ ނަމުގައި މަސް ރޭހެއް ބޭއްވުމަށް ކެޔޮޅުންގެ ލޮބީން ނިންމައިފިއެވެ. މި ރޭހުގައި އެއްވަނައަށް ދާ އޮޑިއަކަށް އެއް ލައްކަ ރުފިޔާގެ ފައިސާގެ އިނާމެއް ކަނޑައަޅާފައިވެއެވެ.
ކެޔޮޅުންގެ ލޮބީން މަޢުލޫމާތު ދިން ގޮތުގައި މި މަސް ރޭހަކީ އެ ޖަމިއްޔާގެ އަހަރީ ދުވަހާއި މަސްވެރިންގެ ދުވަސް ފާހަގަ ކުރުމުގެ ގޮތުން މިއަހަރުގެ ޑިސެމްބަރު 5 ވަނަ ދުވަހު ބާއްވާ ރޭހެކެވެ. 24 ގަޑިއިރަށް ކުރިއަށްދާ މި ރޭހުގެ މައިގަނޑު މަޤްޞަދަކީ ދޮށީގެ މަސްވެރި އާއިލާތަކުގެ މެދުގައި އެކުވެރިކަން އާލާކޮށް، ގުޅުން ބަދަހިކުރުމެވެ.
ކެޔޮޅުންގެ ލޮބީގެ ރައީސް ޝަފްގާ ޝަފީގް ވިދާޅުވި ގޮތުގައި މި ރޭހުގެ އަމާޒަކީ ޒުވާނުން ދޮށީގެ މަސްވެރިކަމަށް ޝައުޤުވެރިކުރުވައި، މަސްވެރިކަމާ ދުރަށް ގޮސްފައިވާ ޒުވާނުން އަނބުރާ މި ދާއިރާއަށް ގެނައުމެވެ. "މިރޭހުގެ މައިގަނޑު އެއް މަގްސަދަކީ، ޒުވާނުން ދޮށީ މަސްވެރިކަމަށް ޝައުގުވެރިކުރުވައި، މަސްވެރިކަމާ ދުރަށް ދިޔަ ޒުވާނުން އަނބުރާ ގެނައުން. އަދި މަސްވެރިންގެ މެދުގައި އެކުވެރިކަން އާލާކޮށް، އެއްބައިވަންތަކަމުގެ ރޫހު ދިރުވުން،" ޝަފްގާ ވިދާޅުވިއެވެ.
މިފްކޯގެ ކޫއްޑޫ ފިޝަރީޒް ކޮމްޕްލެކްސް (ކޭއެފްސީ) ގައި ބޭއްވުމަށް ހަމަޖެހިފައިވާ މި ރޭހުގައި ބައިވެރިވެވޭނީ ފިޝަރީޒް މިނިސްޓްރީން ދޫކުރާ މަސްވެރިކަމުގެ ލައިސަންސް އޮންނަ އަދި ގައުމީ މަސްވެރިންގެ ދަފްތަރުގައި ރަޖިސްޓްރީވެފައިވާ އޮޑިފަހަރަށެވެ. ރޭހުގެ ވަނަތައް ކަނޑައަޅާނީ މިހާރުވެސް ދޮށީގެ މަސްވެރިން މަސްކިރާ އުސޫލާ އެއްގޮތަށް މަހުގެ ބަރުދަނަށް ބަލައިގެންނެވެ.
މި ރޭހުގައި އެއްވަނައަށް ދާ އޮޑިއަކަށް އެއް ލައްކަ ރުފިޔާ، ދެވަނައަށް ދާ އޮޑިއަކަށް 50,000 ރުފިޔާ އަދި ތިންވަނައަށް ދާ އޮޑިއަކަށް 25,000 ރުފިޔާ ލިބޭނެއެވެ.
މީގެ އިތުރުން އެންމެ ކުރިން ރޭސް ނިންމާ އޮޑިއަކަށް 5,000 ރުފިޔާގެ ޚާއްޞަ އިނާމެއް ދިނުމަށް ވަނީ ހަމަޖެހިފައެވެ. ރޭހުގައި ބައިވެރިވުމުގެ ފުރުޞަތު މާދަމާ އާންމުކޮށް ހުޅުވާލާނެ ކަމަށް ކެޔޮޅުންގެ ލޮބީން މަޢުލޫމާތު ދީފައިވެއެވެ.