ޔުނައިޓެޑް ނޭޝަންސް އޯޝަން ކޮންފަރެންސް 3 (ޔޫއެންއޯސީ3) ގެ ބޭރުގައި، މިނިސްޓަރ އޮފް ޓޫރިޒަމް އެންވަޔަރަންމަންޓް، އޮނަރަބަލް ޠާރިޤް އިބްރާހީމް، ޔުނައިޓެޑް ކިންގްޑަމްގެ ޚާއްޞަ މަންދޫބު މިސް ރުތު ޑޭވިސްއާ ބައްދަލުކުރައްވައިފިއެވެ.
މި ބައްދަލުވުމުގައި މިނިސްޓަރ ޠާރިޤް އިބްރާހީމް ވަނީ ޔޫކޭ ސަރުކާރުން ދިވެހިރާއްޖެއަށް ދެމުންގެންދާ އެހީތެރިކަމަށް ޝުކުރު އަދާކުރައްވާފައެވެ. ޚާއްޞަކޮށް ޙިމާޔަތްކުރެވިފައިވާ ސަރަޙައްދުތައް މެނޭޖްކުރުމާއި ޤާބިލުކަން އިތުރުކުރުމުގެ ދާއިރާތަކުން ދެމުންގެންދާ އެހީތެރިކަމަށް މިނިސްޓަރ ވަނީ ޝުކުރުވެރިވެވަޑައިގެންފައެވެ.
މި ބައްދަލުވުމަކީ ތިމާވެށި ރައްކާތެރިކުރުމާއި މޫސުމަށް އަންނަ ބަދަލުތަކާ ގުޅޭގޮތުން ދެ ޤައުމުގެ ދެމެދުގައި އޮންނަ ގުޅުން އިތުރަށް ބަދަހިކުރުމަށް މަގުފަހިވެގެންދާނެ ބައްދަލުވުމެއް ކަމަށް ބެލެވެއެވެ. އަދި މިފަދަ ބައްދަލުވުންތަކުން ދިވެހިރާއްޖެއަށް ކުރިމަގުގައި ލިބިގެންދާނެ ފައިދާތަކާ މެދު އުއްމީދު ކުރެވެއެވެ.
ޔޫއެންއޯސީ3 އަކީ ފުރާންސްގައި ކުރިއަށްދާ ބައިނަލްއަޤްވާމީ ކޮންފަރެންސެކެވެ. މި ކޮންފަރެންސްގައި ދުނިޔޭގެ އެކި ޤައުމުތަކުގެ އިސްވެރިންނާއި ތިމާވެށީގެ ދާއިރާގެ މާހިރުން ބައިވެރިވެ، ކަނޑުތަކާއި ކަނޑުގެ ވަސީލަތްތައް ދެމެހެއްޓެނިވި ގޮތެއްގައި ބޭނުންކުރުމާ ގުޅޭ ގޮތުން މަޝްވަރާކުރެއެވެ.