ޔޫ.އެން.އޯ.ސީ 3 ގެ ތެރެއިން ބޭއްވުނު އޯޝަން އެކްޝަން ޕެނަލް 4 ގައި އެލަޔަންސް އޮފް ދަ ސްމޯލް އައިލެންޑް ސްޓޭޓްސް (އޯސިސް) ގެ ފަރާތުން ދިވެހިރާއްޖެއިން ބަޔާނެއް އިއްވައިފިއެވެ.
މިބަޔާން އިއްވަވައިދެއްވީ މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓް، އޮނަރަބަލް ޠާރިޤް އިބްރާހީމްއެވެ.
މި ބަޔާނުގައި، ވަޒީރު ޠާރިޤް އަލިއަޅުވާލެއްވީ ކަނޑާއި މޫދު ތަޣައްޔަރުވުމުގެ ސަބަބުން ކުދި ޖަޒީރާ ޤައުމުތަކަށް ކުރާ ނޭދެވޭ އަސަރުތަކުގެ މައްޗަށެވެ. އަދި ޚާއްޞަކޮށް އެއްގަމުގެ ހަރަކާތްތަކުން ކުރާ އަސަރުތަކަށް އިޝާރާތްކުރެއްވިއެވެ. ކުދި ޖަޒީރާ ޤައުމުތަކަށް ކަނޑުގެ ތިމާވެށި ތަޣައްޔަރުވުމުގެ އަސަރު ބޮޑަށް ކުރާކަމަށް ފާހަގަކޮށް، އެސް.ޑީ.ޖީ 14 ހާސިލުކުރުމަށް އަދި ޕްލާސްޓިކް މަދުކުރުމުގެ މުއާހަދާ އައި.އެން.ސީ 5.2 ގައި ހަރުދަނާކޮށް ތަންފީޒުކުރުމަށް ބައިނަލްއަޤްވާމީ މުޖުތަމަޢުގެ އެހީތެރިކަން ހޯދުމަށް ގޮވާލައްވާފައިވެއެވެ.
މީގެ އިތުރުން ވަޒީރު ގޮވާލެއްވީ މިހާރުގެ ޖީލުތަކާއި އަންނަން އޮތް ޖީލުތަކުގެ ޙައްޤުގައި، ދުނިޔޭގެ ފުރާނައިގެ ގޮތުގައި ބެލެވޭ ކަނޑުތަކާއި މޫދުތަކަށް އިޙްތިރާމްކުރުމަށް ހުރިހާ ފަރާތްތަކުން ކުރިއަށް ނިކުމެ މަސައްކަތްކުރުމަށެވެ.
ރާއްޖެއިން މި ބަޔާން އިއްވުމުގެ މުހިންމުކަން ފާހަގަކުރެވެނީ، ކަނޑުގެ ވަސީލަތްތަކަށް ބަރޯސާވާ ކުދި ޖަޒީރާ ޤައުމުތަކުގެ އަޑު ބައިނަލްއަޤްވާމީ މައިދާނުގައި އުފުލުމަށް މަގުފަހިވެގެން ދިއުމެވެ. މީގެ އިތުރުން، ތިމާވެށި ރައްކާތެރިކުރުމަށް ކުރެވޭ މަސައްކަތްތަކުގައި ދިވެހިރާއްޖެއިން އިސް ދައުރެއް އަދާކުރަމުންދާކަން މި ބަޔާނުން ހާމަވެގެންދެއެވެދެއެވެ.
ޔޫ.އެން.އޯ.ސީ 3 އަކީ ދެމެހެއްޓެނިވި ގޮތެއްގައި ކަނޑުގެ ވަސީލަތްތައް ބޭނުންކުރުމާއި ބެހޭގޮތުން މަޝްވަރާކުރުމަށް ބޭއްވޭ މުހިންމު ބައްދަލުވުމެކެވެ. މި ބައްދަލުވުމުގައި ދިވެހިރާއްޖެއިން ބައިވެރިވެ، އޯސިސްގެ ފަރާތުން ބަޔާން އިއްވުމަކީ ޤައުމީ އަދި ސަރަޙައްދީ ފެންވަރުގައި ދިވެހިރާއްޖެއިން އަދާކުރާ މުހިންމު ދައުރު ދައްކުވައިދޭ ކަމެކެވެ.