އިންޑިއާގެ ގުޖުރާތުގެ އަހުމަދުއާބާދުން އުދުހިތާ މާގިނައިރުތަކެއް ނުވެ އެއާއިންޑިއާގެ ބޮއިންގް 787 ޑްރީމްލައިނާ މަތިންދާބޯޓު ވެއްޓިފައި ވަނީ އޭގެން ދަތުރުކުރި 242 އޭގެން ދަތުރުކުރި ފަސިންޖަރުންނާއެކުއެވެ. މި ހާދިސާ ހިނގުމުގެ 2 ގަޑިއިރު ކުރިން ފްލައިޓުން ދަތުރު ކުރި ކަމަށް ބުނާ މީހަކު، އެ ފްލައިޓުން ފާހަގަ ކުރެވުނު އާދަޔާ ހިލާފު ކަންތައްތަކެއްގެ ވާހަކަ މީސްމީޑިއާގައި ވަނީ އާންމުކޮށްފައެވެ.
އާކާޝް ވަޓްޝާ ނަމަކަށް ކިޔާ މީހަކު މި ވާހަކަތައް އޭނާ “އެކްސް” ގައި ކުރި ޕޯސްޓެއްގައި ހިއްސާކޮށްފައިވާއިރު، އޭނާ ބުނެފައިވާގޮތުގައި އޭނާ އަކީ ދިއްލީން އަހުމަދުއާބާދަށް އެބޯޓުން 2 ގަޑިއިރު ކުރިން ދަތުރު ކުރި މީހެކެވެ.
އޭނާ ބުނެފައިވާގޮތުގައި ފްލައިޓުގެ “އިންފްލައިޓް-އެންޓަޓައިންމެންޓް” މަސައްކަތް ނުކުރާ ކަމަށެވެ. އެގޮތުން، އޭނާ ހިއްސާކޮށްފައިވާ ފޮޓޯ އަދި ވީޑިއޯއިން ފެންނަ ގޮތުގައި އޭނާ އިށީނދެގެން އިން ސީޓުގައި ހުރި ކުޑަ ޓީވީއާއި މަސައްކަތްނުކުރާ މަންޒަރު ދައްކައެވެ.
އަދި އޭގެ އިތުރުން އޭނާ ވަނީ ބޯޓުގެ އޭސީ މަސައްކަތް ނުކުރާ ކަމަށާއި ދަތުރުގައި ތިބެންޖެހުނީ ގަދަ ހޫނުގައި ކަމަށެވެ.
ވަޓްޝާ ހިއްސާކޮށްފައިވާ ވީޑިއޯއިން ބޯޓުގެ އޭސީ މަސައްކަތް ނުކުރާތީ މީހުން ފޮތް ފަދަ ތަކެތިން ވިހެގެން ވައި ޖައްސާ މަންޒަރު ފެންނައިރު، ދިއްލީން އަހްމަދުއާބާދަށް އައުމަށް ފަސިންޖަރުން ފްލައިޓަށް އަރާފައި ވަނިކޮށް ފްލައިޓް ނަންބަރު ބަދަލުކުރި ކަމަށްވެސް އޭނާ ވަނީ ބުނެފައެވެ.
އެއާއިންޑިއާ އެއާލައިނުން ނެރުނު ބަޔާނެއްގައި ބުނެފައިވާ ގޮތުގައި އެ ބޯޓުގައި އިންޑިއާގެ 169 ރައްޔިތަކާއި، އިނގިރޭސިވިލާތުގެ 53 ރައްޔިތަކާއި، ކެނެޑާގެ މީހަކާއި، ޕޯޗުގީޒުންގެ 7 މީހަކު ދަތުރުކޮށްފައިވެއެވެ.
ބޯޓު ވެއްޓިފައިވަނީ އަރަން ޖެހޭ އުސް މިނަށް ނާރައިގެން ކަމަށް ތަޖުރިބާކާރުން ބުނި ނަމަވެސް ރަސްމީ އެއްވެސް އިދާރާއަކުން އަދި ވަކި އެއްޗެއް ހާމަކޮށްފައެއް ނުވެއެވެ.
މިހާދިސާގައި އެކަކު ފިޔަވާ ބޯޓުން ދަތުރުކުރި އެންމެން މަރުވެފައިވާ ކަމަށް ރިޕޯޓްތަށް ބުނެއެވެ.