ޖުލައި 26 ގައި ގއ ގެމަނަފުށީގައި ފެށުމަށް ހަމަޖެހިފައިވާ ވޮލީ މުބާރާތުގައި ފުވައްމުލަކު ސިޓީ ހިމެނޭހެން ވަރުގަދަ 10 ޓީމް ބައިވެރިވެއްޖެއެވެ.
2 ޖިންސަށް ހުޅުވާލައިގެން ބާއްވާ މި މުބާރާތުގައި އަންހެން 5 ޓީމް އަދި ފިރިހެން 5 ޓީމް ވާދަކުރާނެއެވެ. މިއީ އަތޮޅުގައި ބޭއްވޭ އެންމެ ފޯރިގަދަ މުބާރާތަށް ވާނެކަމަށް ގިނަ ބަޔަކު ދެކެއެވެ. ސަބަބަކަށްވަނީ ރަށުން ބޭރުން ވަރުގަދަ ޓީމްތަކެއް ވާދަކުރާތީއެވެ.
ފާހަގަ ކޮށްލެވޭ ޓީމްތަކަށް ބަލާއިރު ފުވައްމުލަކު ސިޓީ ހިމެނޭހެން ގދ ފިޔޯރީ ވޮލީ ޓީމާއި ގއ ނިލަންދޫ އަދި ކަނޑުހުޅުދޫ ވޮލީ ޓީމްތަކަކީ ވޮލީގައި ނަންކިޔާލެވޭ ޓީމްތަކެވެ. މީގެ އިތުރުން ފަހަކަށް އައިސް ވޮލީގައި ބޮޑު ކުރިއެރުންތަކެއް ހޯދަމުން އަންނަ ކޮނޑޭ ވެލާ ޓީމް ވެސް މުބާރާތުގައި ވާދަކުރެއެވެ.
މުބާރާތުގެ ތައްޔާރުވުމަށް ބަލާއިރު ހުރިހާ ޓީމްތަކުންވެސް ފޯރިއާއިއެކު ޕްރެކްޓިސް ކުރަމުންދާއިރު، މުބާރާތުގެ ތައްޔާރީތައް ކައުންސިލުން ދަނީ ކުރަމުންނެވެ. އަދި ކައުންސިލްގެ ވިސްނުމަކީ ފެންވަރުގެ ގޮތުން ފޯރިގަދަ މުބާރާތެއް ބޭއްވުމެވެ.
މުބާރާތުގައި ބައިވެރިވެފައިވާ ފިރިހެން ޓީމްތަކަކީ ގެމަނަފުށި ވޮލީ ކުލަބު، ވެލާ، ފޭސް ފިޔޯރީ ވޮލީޓީމް، ކާމިޔާބު ވޮލީޓީމް، ހުޓިކޮޑާ، އަދި ނިލަންދޫ ވޮލީޓީމެވެ. އަދި އަންހެން ޓީމްތަކަކީ ސީ ކުއީންސް، ގެމަނަފުށީ ވޮލީ ކުލަބު، ކަނޑުހުޅުދޫ ވޮލީޓީމް، އިގްނައިޓް ޖޫނިއާސް، ހުޓިކޮޑާ ކަނބަލުންނެވެ.
މުބާރާތުގެ ޗެމްޕިއަން ޓީމްއަށް 50000 ރުފިޔާގެ ފައިސާގެ އިނާމެއް ދިނުމަށް ނިންމާފައިވާއިރު ރަނަރަޕް ޓީމަށް 25000 ރުފިޔާގެ ފައިސާގެ އިނާމެއް ވަނީ ހުށައަޅާފައެވެ.
މުބާރާތް ކުޅުމަށް ހަމަޖެހިފައިވަނީ ގެމަނަފުށި ރަސްމީ ވޮލީކޯޓުގައެވެ.
ވޮލީކޯޓު ޒަމާނީ ފެންވަރަށް ތަރައްގީ ކުރުމާއިއެކު މި ބޭއްވޭ މުބާރާތަކީ ދެކުނުގައި ބޭއްވޭ އެންމެ ފޯރިގަދަ މުބާރާތަށް ވާނެކަމަށް ގިނަބަޔަކު ގަބޫލުކުރެއެވެ.
ހާއްސަކޮށް ގެމަނަފުއްޓަކީ ވޮލީގެ ހާއްސަ ރަށަކަށްވެފައި ސަރަހައްދުގައި ބޭއްވޭ ގިނަ މުބާރާތްތަކުން އެރަށުގެ ޓީމްތައްދަނީ ރަނގަޅު ކާމިޔާބީތަކެއް ހޯދަމުންނެވެ.