ފަސް މިލިއަން ގަސް އިންދުމުގެ ޤައުމީ މަޝްރޫޢުގެ ދަށުން، ރ. އަތޮޅުގެ ދުވާފަރާއި އުނގޫފާރުގައި ޚާއްސަ ގަސް އިންދުމުގެ ޙަރަކާތްތަކެއް ވަނީ ކުރިއަށް ގެންގޮސްފައެވެ.
މި ޙަރަކާތްތަކަކީ ރާއްޖޭގެ ތިމާވެށި ހިމާޔަތްކޮށް، ގަސްގަހާގެހި އިތުރުކުރުމަށް ސަރުކާރުން ދެއްވާ އިސްކަމުގެ ދަލީލެކެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދެއްގެ ގޮތުގައި ފެށިގެން ކުރިއަށްގެންދާ މި މަޝްރޫޢުގެ މައިގަނޑު މަޤްޞަދަކީ ދިވެހިރާއްޖޭގެ އެކި ކަންކޮޅުތަކުގައި ފަސް މިލިއަން ގަސް އިންދުމުގެ ތެރެއިން ތިމާވެށި ރައްކާތެރިކޮށް، ގްރީން ކަވަރ ރޭޝިއޯ މަތިކުރުމެވެ. މީގެ އިތުރުން، ކްލައިމެޓް ޗޭންޖްގެ ނޭދެވޭ އަސަރުތަކުން ރާއްޖެ ސަލާމަތްކުރުމަށްޓަކައި އަޅާ މުހިއްމު ފިޔަވަޅެކެވެ.
ރ. ދުވާފަރާއި އުނގޫފާރުގައި ކުރިއަށް ގެންދެވުނު ގަސް އިންދުމުގެ ޚާއްސަ ޙަރަކާތުގައި އެ ދެރަށުގެ ކައުންސިލްތަކާއި، އެ ރަށްރަށުގެ ދެޖިންސުގެ ގިނަ އަދަދެއްގެ ރައްޔިތުންނާއި، ސަރުކާރުގެ ބައެއް އިދާރާތަކުގެ ފަރާތުން ބައިވެރިވެފައިވެއެވެ. މި ޙަރަކާތުގައި، ދިވެހިރާއްޖޭގެ މާހައުލަށް އެކަށޭނަ ގަސްގަހާގެހި އިންދާފައިވާކަމަށް މަޢުލޫމާތު ލިބިފައިވެއެވެ. މި ޙަރަކާތުގެ ސަބަބުން، ރައްޔިތުންގެ މެދުގައި ތިމާވެށީގެ ހޭލުންތެރިކަން އިތުރުވެ، އެފަދަ މަސައްކަތްތަކުގައި ބައިވެރިވުމަށް ހިތްވަރު ލިބިގެންދާނެކަމަށް ބެލެވެއެވެ.
ފަސް މިލިއަން ގަސް އިންދުމުގެ މި މަޝްރޫޢު ރާއްޖޭގެ އެކި ރަށްރަށުގައި ކުރިއަށްދާނެކަމަށް ސަރުކާރުން ބުނެފައިވާއިރު، މިފަދަ ޙަރަކާތްތަކުގެ ސަބަބުން ރާއްޖޭގެ ރީތިކަމާއި ތިމާވެށި ރައްކާތެރިކުރުމަށް ވަރަށް ބޮޑު އެހީތެރިކަމެއް ލިބިގެންދާނެއެވެ. ސަރުކާރުގެ މިފަދަ ދުރުވިސްނޭ މަޝްރޫޢުތަކުގެ ސަބަބުން ދިވެހިރާއްޖޭގެ މުސްތަޤްބަލު އުޖާލާވެގެންދާނެކަމަށް އުންމީދު ކުރެވެއެވެ.