ފެނަކަ ކޯޕަރޭޝަން ލިމިޓެޑުން ހިންގުމަށް ހަމަޖެހިފައިވާ މަޝްރޫޢުތަކަށް ބޭނުންވާ ތަކެތި އެ ރަށްރަށަށް ފޮނުވަން ފަށައިފިއެވެ. މިގޮތުން ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ)ގެ ދަށުން އެ ކުންފުނިން ރާއްޖޭގެ ރަށްތަކުގައި ހިންގުމަށް ހަމަޖެހިފައިވާ މަޝްރޫޢުތައް ފެށުމަށް ބޭނުންވާ ތަކެތި ރަށްރަށަށް ފޮނުވުމުގެ މަސައްކަތް މިއަދު ވަނީ ފަށާފައެވެ.
ފެނަކައިން މިއަދު ދެއްވި މަޢުލޫމާތުގައި ވިދާޅުވި ގޮތުގައި، ށ. ނޫމަރާ އަދި ށ. ގޮއިދޫގައި ޤާއިމުކުރަން ހަމަޖެހިފައިވާ ޕޮލިސް ޕޯސްޓުތައް އިމާރާތްކުރުމުގެ ޢަމަލީ މަސައްކަތް ފެށުމަށް ބޭނުންވާ ތަކެތި މިހާރު ވަނީ އެ ރަށްތަކަށް ފޮނުވާފައެވެ.
އިތުރު މަޢުލޫމާތު ދެމުން ފެނަކައިން ފާހަގަކުރެއްވި ގޮތުގައި، މީގެ އިތުރުންވެސް ރާއްޖޭގެ ގިނަ ރަށްތަކެއްގައި އެކިއެކި މަޝްރޫޢުތައް ހިންގުމަށް އެ ކުންފުންޏާ ވަނީ ހަވާލުކުރެވިފައެވެ.
ފެނަކައިން އިތުރަށް ބުނެފައިވަނީ، މި މަޝްރޫޢުތައް ފެށުމަށް ކުރެވެމުންދާ ތައްޔާރީތަކާއި މަޝްރޫޢުތަކުގެ މަސައްކަތްތައް ކުރިއަށްދާނެ ގޮތުގެ މަޢުލޫމާތު ކުރިއަށް އޮތްތާގައި ޢާންމުންނާ ހިއްސާކުރަމުން ގެންދާނެ ކަމަށެވެ.
ފެނަކައިން ހިންގާ މިފަދަ މަޝްރޫޢުތަކަކީ ރަށްރަށުގެ ވަޞީލަތްތައް ތަރައްޤީކޮށް، ރައްޔިތުންނަށް ދެވޭ ޚިދުމަތްތައް ފުޅާކުރުމަށް އެޅޭ މުހިންމު ފިޔަވަޅުތަކެކެވެ.