ކުޑަކުދިންނަށް ކުރާ އަނިޔާ ނައްތާލުމާ ގުޅޭ މަޢުލޫމާތު ހިއްސާކުރުމުގެ މިނިސްޓީރިއަލް އޮންލައިން ބައްދަލުވުމެެއްގައި އިޖުތިމާޢީ އަދި އާއިލީ ތަރައްޤީއާއި ބެހޭ ވަޒީރު، ޑރ. އާއިޝަތު ޝިހާމް ބައިވެރިވެވަޑައިގެންފިއެވެ.
މި ބައްދަލުވުމުގައި މިނިސްޓަރ ޑރ. ޢާއިޝަތު ޝިހާމް ވަނީ، ކުޑަކުދިންނަށް ކުރާ ހުރިހާ ބާވަތެއްގެ އަނިޔާއިން ރައްކާތެރިކުރުމަށް ދިވެހިރާއްޖޭގައި ހެދިފައިވާ ޤާނޫނީ އޮނިގަނޑުތަކާއި، ކުޑަކުދިންގެ ރައްކާތެރިކަން ކަށަވަރުކުރުމަށް ކުރެވެމުންދާ މަސައްކަތްތަކުގެ މައްޗަށް އަލިއަޅުވާލައްވާފައެވެ. އަދި ވަޒީރުގެ ވާހަކަފުޅުގައި ވަނީ ބޮގޮޓާ ކޯލް ޓު އެކްޝަންގެ މުހިންމުކަމާ ގުޅޭ ގޮތުންވެސް ވާހަކަފުޅު ދައްކަވާފައެވެ.
ނޭޕާލުގައި ކުރިއަށްދިޔަ މި ބައްދަލުވުމަކީ، ސައުތު އޭޝިއަން އެސޯސިއޭޝަން ފޯރ ރީޖަނަލް ކޯޕަރޭޝަން (ސާރކް) ގެ ސެކްރެޓޭރިއަޓްއާއި، ޔުނައިޓަޑް ނޭޝަންސް ޗިލްޑްރަންސް ފަންޑް (ޔުނިސެފް) ގެ ރީޖަނަލް އޮފީސް ފޯރ ސައުތު އޭޝިއާ (ރޯސާ) އާއި، ދުނިޔޭގެ ޞިއްޙަތު ޖަމުޢިއްޔާ (ޑަބްލިއު.އެޗް.އޯ) ގެ ސައުތު އީސްޓް އޭޝިއާގެ ރީޖަނަލް އޮފީހާއި، އީސްޓަރން މެޑިޓެރޭނިއަން ރީޖަންގެ އޮފީހާއި، އޮފީސް އޮފް ދަ ސްޕެޝަލް ރިޕްރެސެންޓޭޓިވް އޮފް ދަ ޔޫ.އެން ސެކްރެޓަރީ ޖެނެރަލް އޮން ވައިލެންސް އަގައިންސްޓް ޗިލްޑްރެން ގުޅިގެން ކުރިއަށް ގެންދެވުނު ބައްދަލުވުމެކެވެ.