ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ވަޢުދުފުޅާ އެއްގޮތަށް، ޙާފިޒުންނަށް ދެމުންގެންދާ އެލަވަންސް 2025 ވަނަ އަހަރުގެ ޖުލައި މަހުން ފެށިގެން ދެގުނައަށް ބޮޑުކުރުމަށް ސަރުކާރުން ނިންމައިފިއެވެ.
މިކަން ރައީސް މުޢިއްޒު ވަނީ އެކްސްގައި ކުރެއްވި ޕޯސްޓެއްގައި ހާމަކުރައްވާފައެވެ.
ރައީސް މުޢިއްޒު ވިދާޅުވި ގޮތުގައި މި ނިންމުމަކީ މި ހަފްތާގައި ބޭއްވުނު ވަޒީރުންގެ މަޖިލީހުގެ ޖަލްސާގައި ނިންމި ނިންމުމެކެވެ. އަދި "ޙާފިޒުން ތަމްރީނު ކުރުމާއި ޙާފިޒުންނަށް ދޭ އަހައްމިއްޔަތުކަން އިތުރު ކުރުމަކީ ކީރިތި ޤުރުއާނަށް އޮންނަ ލޯބި އިތުރު ކުރުމުގައި ނުހަނު މުހިއްމު ކަމެއް" ކަމުގައި ފާހަގަ ކުރެއްވިއެވެ.
ފާއިތުވި އަހަރުތަކާ އަޅާބަލާއިރު، 2024 ވަނަ އަހަރަކީ އެންމެ ގިނަ ޙާފިޒުން އުފެދުނު އަހަރު ކަމުގައި ވެފައިވާއިރު، މި އަހަރު 24 ފަރާތަކުން ވަނީ ކީރިތި ޤުރުއާން ހިތުދަސްކޮށް ޙާފިޒުކަމުގެ ސަނަދު ހާސިލު ކޮށްފައެވެ. މީގެ އިތުރުން، ޙާފިޒުން ދަސްވެނިވުމަށް ޚާއްސަ ރަސްމިއްޔާތެއް ބޭއްވުމަށް ވެސް ވަނީ ފަށާފައެވެ. މި ގޮތުން މި އަހަރުގެ ރަސްމިއްޔާތު ބޭއްވިފައިވަނީ ރަމަޟާން މަހުގެ 27 ވަނަ ރޭގައެވެ.
ސަރުކާރުން މިހާރު ވަނީ ޙާފިޒުންނަށް ޚާއްސަ ތާކިހަލާއި ގައުނެއް ވެސް ފަރުމާކޮށްފައެވެ. އަދި ސަރުކާރުގެ އަމާޒަކީ އަހަރަކު 100 ޙާފިޒުން އުފެއްދުމެވެ. އިސްލާމިކް މިނިސްޓްރީން އަމާޒު ހިފާފައިވަނީ އަންނަ ފަސް އަހަރު ތެރޭގައި ޙާފިޒުކަމުގެ ސަނަދު ހާސިލުކުރާ ދަރިވަރުންގެ އަދަދު 1,000 އަށް އިތުރުކުރުމަށެވެ.