ސްޓެލްކޯގެ މުވައްޒަފުންނަކީ ކަންކަމަށް ގާބިލު އަދި ކުރިމަތިވާ ގޮންޖެހުންތަކުން އަރައިގަތުމުގެ ހާއްސަ ސިފައެއް ލިބިފައިވާ ބޭފުޅުން ކަމަށް އެ ކުންފުނީގެ މެނޭޖިން ޑިރެކްޓަރު ހުސައިން ފަހުމީ ވިދާޅުވެއްޖެއެވެ.
މިއަދު ބޭއްވި ސްޓެލްކޯ އިންހައުސް ޓްރެއިނާސް ޕޫލް އިފްތިތާހުކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ފަހުމީ ވިދާޅުވީ، ގޮންޖެހުންތަކުން އަރައިގަތުމުގެ ސިފައަކީ ސްޓެލްކޯގެ މުވައްޒަފުންނަށް ލިބިގެންވާ ހާއްސަ ސިފައެއް ކަމަށެވެ.
"އަޅުގަނޑުމެންގެ މުވައްޒަފުންނަށް ލިބިގެންވާ ހާއްސަ ސިފައެއް ގޮންޖެހުން އަރައިގަތުމުގެ ސިފަ. ގޮންޖެހުމަކާ ދިމާވީމާ އެ ގޮންޖެހުމަކުން އަރައިގަތުމުގެ ސިފަ. އެއީ ކަރަންޓު ކެނޑުން ކަމުގައިވިޔަސް އިންޖީނަށް ކަމެއް ދިމާވި ކަމުގައިވިޔަސް އަދި ފެނުގެ ކާރިސާ ހިނގި ކަމުގައި ވިޔަސް އަދި ގައުމަށް ނިކަމެތި ކަމެއް ދިމާވެ ބަޖެޓުގެ ތާށިކަމެއް ދިމާވެ ހަރަދު ކުޑަކުރަން ޖެހުނަސް. އެކަން މިއަދު ފެނިގެން މިދަނީ،" ފަހުމީ ވިދާޅުވިއެވެ.
ސަރުކާރުގެ ހަރަދު ކުޑަކުރުމުގެ ސިޔާސަތުގެ ދަށުން ސްޓެލްކޯގެ މުވައްޒަފުން ކުރަމުންދާ މަސައްކަތް ހުއްޓާނުލާނެ ކަމަށް ފަހުމީ ވިދާޅުވިއެވެ. އަދި ސްޓެލްކޯއިން ރައްޔިތުންނަށް ދެމުންދާ ގައުމީ ހިދުމަތް މެދުނުކެނޑި ދެވޭނީ މުވައްޒަފުން އެކަތިގަނޑަކަށް ހަދައި، ޓްރެއިންކޮށްގެން ކަމަށާއި މި ޓްރެއިން ޕްރޮގްރާމުގެ އެންމެ ބޮޑު މަގްސަދަކީ އެއީ ކަމަށް ވެސް އޭނާ ވިދާޅުވިއެވެ.
އިންހައުސް ޓްރެއިނާސް ޕޫލް އިފްތިތާހު ކުރުމާއެކު، 35 މުވައްޒަފަކަށް ސްޓެލްކޯގެ ސެޓިފައިޑް ޓްރެއިނަރެއްގެ ލައިސަންސް ދޫކޮށްފައިވާއިރު، ބަޖެޓު ތަންނުދިނަސް އިންހައުސްކޮށް ޕްރޮގްރާމް ފެށުމުން ހަރަދުކުޑަކޮށް މުވައްޒަފުންނަށް މާ ރަނގަޅު ތަމްރީނުތަކެއް ދެވޭނެ ކަމަށް ފަހުމީ ވަނީ ފާހަގަކުރައްވާފައެވެ.
ސްޓެލްކޯގެ މެނޭޖްމަންޓުން މިފަދަ ހަރުދަނާ ނިންމުމެއް ނިންމައި ތަންފީޒުކުރާތީ ފަހުމީ ވަނީ އެ ކުންފުނީގެ މެނޭޖްމަންޓަށާއި މުވައްޒަފުންނަށް ޝުކުރު އަދާކުރައްވާފައެވެ. އަދި ލިބިފައިވާ ތަޖުރިބާއަކީ ކުރިމަތިވާ ގޮންޖެހުންތަކުން އަރައިގަންނަން ލިބިފައިވާ އެއްޗެއްކަން ފާހަގަކުރައްވަމުން، ދިމާވާ ކޮންމެ ކަމަކުން ނުވަތަ ގޮންޖެހުމަކުން އަރައިގަތުމުގެ ގާބިލުކަން އެ ކުންފުނީގެ މުވައްޒަފުންގެ ކިބައިގައި އެބަހުރި ކަމަށް ވެސް އޭނާ ވަނީ ވިދާޅުވެފައެވެ.