3800 މީހުންގެ އާބާދީއެއް ދިރިއުޅޭ ހއ. ހޯރަފުށީގެ އެތެރޭ މަގު ހެދުމުގެ މަޝްރޫޢުގެ ދެވަނަ ފިޔަވަހީގެ އަމަލީ މަސައްކަތް އެމްޓީސީސީން ފަށައިފިއެވެ. 30.46 މިލިއަން ރުފިޔާގެ މި މަޝްރޫޢަކީ ރަށުގެ މަގުތައް ތަރައްޤީކޮށް ރައްޔިތުންނަށް ދިމާވެފައިވާ ގިނަ ދަތިތަކަކަށް ހައްލު ހޯދައިދޭނެ މަޝްރޫޢެކެވެ.
ހޯރަފުށްޓަކީ އިޤްތިޞާދީ، އިޖްތިމާޢީ އަދި ޢުމްރާނީ ތަރައްޤީގެ އެކި ކަހަލަ މަޝްރޫޢުތަކުގައި ގިނަ އަދަދެއްގެ ބަރު އުޅަނދުފަހަރު ހަރަކާތްތެރިވާ ރަށެއްކަމުން، ރަނގަޅު ފެންވަރުގެ މަގުތަކެއް ހެދިފައި އޮތުމަކީ ރަށު ރައްޔިތުން ދެކޭގޮތުގައި ވަރަށް މުހިންމު ކަމެކެވެ. މީގެ ކުރިން ރަށުގެ މަގުތައް ރަނގަޅު ފެންވަރަކަށް ހެދިފައި ނެތުމުގެ ސަބަބުން ވިއްސާރަ މޫސުމުގައި ފެންބޮޑުވުމާއި، މަގުތަކުގައި އަޑިގުޑަން އުފެދުމާއި، ހިރަފުހުގެ އުނދަގޫ ކުރިމަތިވަމުން ދިޔައެވެ.
މި މަޝްރޫޢުގެ ދަށުން ކުރިއަށްގެންދާ މަސައްކަތްތަކުގެ ތެރޭގައި ސަބްބޭސް ހެދުމާއި، އޭބީސީ ފަށަލަ އެޅުމާއި، ތާރު އެޅުމާއި، މަގުގެ ދުވާރުގެ މަސައްކަތާއި، ގްރީން އޭރިއާގެ މަސައްކަތް ހިމެނެއެވެ. މީގެ އިތުރުން ކޭބަލް ޖަންކްޝަން އަދި ސަރވިސް ލައިން އެޅުލުމާއި، މަގު ބައްތި ހަރުކުރުމާއި މަގުމަތީ ނިޝާން ހަރުކުރުމުގެ މަސައްކަތްވެސް ހިމެނެއެވެ.
ހޯރަފުށީގެ ތަރައްޤީގެ މަސައްކަތްތަކުގައި އެމްޓީސީސީން ވަނީ މުހިންމު ދައުރެއް އަދާކޮށްފައެވެ. އެގޮތުން ހޯރަފުށި އެއާޕޯޓު މަޝްރޫޢާއި، ގޮނޑުދޮށް ހިމާޔަތްކުރުމުގެ މަޝްރޫޢު އަދި ބޮޑެތި މަގު ހެދުމުގެ ފުރަތަމަ ފިޔަވަހީގެ މަޝްރޫޢު ފާހަގަކޮށްލެވެއެވެ.
1980 ވަނަ އަހަރު އުފެދުނު އެމްޓީސީސީއަކީ ދިވެހިރާއްޖޭގެ ތަރައްޤީގެ ދަތުރުގެ އެންމެ މުހިންމު އެއް މަރުހަލާގައި އުފެދުނު ކުންފުންޏެކެވެ. 44 އަހަރު ފުރިފައިވާ މި ކުންފުނިން ވަނީ ރާއްޖޭގެ އުމްރާނީ ތަރައްޤީއާއި އިޖުތިމާޢީ ވަސީލަތްތައް ގާއިމުކުރުމުގައި ފާހަގަކޮށްލެވޭ މުހިންމު ދައުރެއް އަދާކޮށްފައެވެ.