އެމެރިކާއީން އީރާނާ ދެކޮޅަށް ދޭ ކޮންމެ ޙަމަލާއެއްގެ ބަދަލުގައި މެދުއިރުމަތީގައި ހުންނަ އެމެރިކާގެ އަސްކަރީ މަރުކަޒުތަކަށް އީރާނުން ޙަމަލާ ދޭނެ ކަމުގެ އިންޒާރު އީރާނުގެ ރޫޙީ ވެރިޔާ، އާޔަތުالله ޢަލީ ޚާމަނާއީ ދެއްވައިފިއެވެ.
އީރާނުގެ ރޫޙީ ވެރިޔާ، އާޔަތުالله ޢަލީ ޚާމަނާއީ މިފަދައިން ވިދާޅުވީ ހަނގުރާމަ ހުއްޓާލި ފަހުން ފުރަތަމަ ފަހަރަށް ޤައުމާ މުޚާތަބުކޮށް ވާހަކަ ދައްކަވަމުންނެވެ.
ޖޫން މަހުގެ 13ވަނަ ދުވަހު އިސްރާއީލުން އިސްވެ އީރާނަށް ޙަމަލާދޭން ފެށީ އީރާނުގެ ނިއުކްލިޔަރ މަޝްރޫޢު ހުއްޓުވުމަށް ކަމަށް ބުނެއެވެ. އެ ޙަމަލާތަކުގައި އީރާނުގެ މުހިންމު ސަރަޙައްދުތަކަށް އިސްރާއީލުން ހަމަލާދީފައިވެއެވެ.
އީރާނުގެ ރޫޙީ ވެރިޔާ، އާޔަތުالله ޢަލީ ޚާމަނާއީ ވިދާޅުވީ އީރާނަށް ދޭ ކޮންމެ ޙަމަލާއެއްގެ އަގު އަދާ ކުރަންޖެހޭނެ ކަމަށެވެ. އަދި އެމެރިކާއިން ދިން ޙަމަލާގެ ބަދަލުގައި މެދުއިރުމަތީގައި ހުރި އެމެރިކާގެ އެންމެ ބޮޑު އަސްކަރީ މަރުަކަޒަށް އެ ޤައުމުން ޙަމަލާ ދީފައިވާ ކަމަށެވެ.
މެދުއިރުމަތީގައި ހުންނަ އެމެރިކާގެ މުހިންމު މަރުކަޒުތަކަށް ޙަމަލާ ދިނުމުގެ ޤާބިލިއްޔަތުކަން އީރާނަށް ލިބިފައިވާއިރު، އީރާނަށް ފެނިއްޖެ ހިނދެއްގައި އެ މަރުކަޒުތަކަށް ޙަމަލާ ދިނުމަކީ އާދައިގެ ކަމެއްގެ ގޮތުގައި ދެކިގެން ނުވާނެ ކަމަށް ވެސް އީރާނުގެ ރޫޙީ ވެރިޔާ، އާޔަތުالله ޢަލީ ޚާމަނާއީ ވަނީ ވިދާޅުވެފައެވެ.