މައިކްރޯ، ކުދި އަދި މެދު ފަންތީގެ ވިޔަފާރިތަކަށް ފައިނޭންސާއި މާކެޓްތަކަށް ވާސިލުވުމަށް ބޭނުންވާ ފުރުސަތު ފަހިކޮށްދިނުމަށް ސަރުކާރުން މަސައްކަތް ކޮށްދޭނަން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ “މައިކްރޯ، ސްމޯލް އެންޑް މީޑިއަމް ސައިޒްޑް އެންޓަޕްރައިޒަސް ޑޭ”ގެ މުނާސަބަތުގައި އެކްސްގައި ކުރެއްވި ޕޯސްޓެއްގައެވެ.
ވިޔަފާރިތައް ކުރިއެރުވުމަށް އެހީތެރިވެދީ، މާކެޓުތަކަށް ވަދެވޭނެ ގޮތްތައް ހޯދައިދީ، ކުދި އަދި މެދުފަންތީގެ ވިޔަފާރިތައް ބާރުވެރިކުރުވަން ބޭނުންފުޅުވާ ކަމަށާއި، ދިވެހި ވިޔަފާރިތަކުގެ އުފެއްދުންތައް ދައްކުވައިދިނުމަށް މިދިޔަ މަހު ބޭއްވި މޯލްޑިވްސް އެކްސްޕޯ 2025ގެ ކާމިޔާބީއާއެކު ކުދި ވިޔަފާރިތަކަށް ވެސް ކުރިއަރައިގެން ދެވޭނެ މަގެއް ހޯދައިދޭން ސަރުކާރުން ބޭނުންވާ ކަމަށް އެ މަނިކުފާނު ވިދާޅުވިއެވެ.
ރައީސް ވިދާޅުވީ އަޅުގަނޑުމެންގެ ރަށްތަކުގައި އަދި ދުނިޔޭގެ އެކި ކަންކޮޅުތަކުގައި ދެމެހެއްޓެނިވި ކުރިއެރުން ގެނެސްދޭ ވިޔަފާރިވެރިންނާއި އާއީޖާދުތައް ހޯދާ މައިކްރޯ، ކުދި އަދި މެދު ފަންތީގެ ވިޔަފާރިވެރިންގެ ހިދުމަތް ފާހަގަ ކުރައްވާ ކަމަށެވެ.
2040 ވަނަ އަހަރާ ހަމައަށް ތަރައްޤީވެފައިވާ ޤައުމަކަށް ރާއްޖެ ވުމަށް މަސައްކަތްކުރާއިރު، މައިކްރޯ، ކުދި އަދި މެދު ފަންތީގެ ވިޔަފާރިތަކަށް ކުރިއެރުން ލިބޭނެ މާހައުލެއް ޤާއިމުކުރުމަށާއި އިޤްތިޞާދީ ތަނަވަސްކަން އިތުރުކުރުމަށް ސަރުކާރުން ދެމިއޮންނާނެ ކަމަށް ވެސް ރައީސް ވިދާޅުވިއެވެ.