ވެލާނާ އިންޓަރނޭޝަނަލް އެއަރޕޯޓުގެ އައު އިންޓަރނޭޝަނަލް ޓަރމިނަލާއެކު އަހަރުން އަހަރަށް ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ވަރަށް ބޮޑަށް އިތުރުވާނެ ކަމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ މެނޭޖިން ޑިރެކްޓަރ އިބްރާހިމް ޝިއުރީ ވިދާޅުވެއްޖެއެވެ.
އައު ޓަރމިނަލާ ގުޅޭގޮތުން ސޯޝަލް މީޑިއާގައި ޢާންމުކުރެއްވި ވީޑިއޯ ޕޯސްޓެއްގައި ޝިއުރީ ވިދާޅުވީ، "ދުނިޔޭގެ ލެވެލްގައި ފާހަގަކުރެވޭ ޓާމިނަލަކަށް މި ޓާމިނަލް ވާނެކަން ޔަޤީން ކުރަން. މި ޓަރމިނަލުން ޚިދުމަތް ލިބިގަންނަ ފަތުރުވެރިންނަށްވެސް ބައިނަލްއަޤުވާމީ ފެންވަރުގެ ގިނަ ތަޖުރިބާތަކެއް ކުރެވޭނެ" ކަމަށެވެ.
2017 ވަނަ އަހަރު ފެށި މި މަޝްރޫޢަކީ ރާއްޖޭގެ އިޤުތިޞާދަށް އެތައް ގޮތަކުން ފައިދާކުރާނެ ޢުމްރާނީ ތަރައްޤީގެ ބިޔަ މަޝްރޫޢެކެވެ. މިހާރު ހުރި ޓަރމިނަލުން އަހަރަކު 1.5 މިލިޔަން މީހުންނަށް ޚިދުމަތް ދެވޭއިރު، އައު ޓަރމިނަލާއެކު އަހަރަކު 7 މިލިޔަން ފަސިންޖަރުންނަށް ޚިދުމަތް ދެވޭނެއެވެ.
78 ހާސް އަކަ މީޓަރުގެ މި ޓަރމިނަލަކީ ހަމައެކަނި ބައިނަލްއަޤްވާމީ ދަތުރުތަކަށް ބޭނުންކުރާނެ، އެއިރޯ ބްރިޖްތައް ހިމެނޭ ޒަމާނީ ޓަރމިނަލެކެވެ. އަދި މި ޓަރމިނަލް ހުޅުވުމަށް ހަމަޖެހިފައިވަނީ އަންނަ މަހުގެ 26 ވަނަ ދުވަހު، 60 ވަނަ މިނިވަން ދުވަހުއެވެ.
މިހާރު ރާއްޖެއަށް އަހަރަކު 2 މިލިޔަނަށްވުރެ ގިނަ ފަތުރުވެރިން ޒިޔާރަތްކުރާއިރު، އައު ޓަރމިނަލާއެކު މި އަދަދު އިތުރަށް މަތިވެގެންދާނެކަމަށް ފަތުރުވެރިކަމުގެ ސިނާޢަތުގައި ހަރަކާތްތެރިވާ ގިނަ ފަރާތްތަކުން ފާހަގަކުރައްވައެވެ.