އެސް.ޖޭ ކޮންސްޓްރަކްޝަނާ ހަވާލުކުރައްވައިގެން ހުޅުމާލޭ ދެވަނަ ފިޔަވަހީގައި އިމާރާތްކުރައްވަމުން ގެންދަވާ މިސްކިތުގެ މަސައްކަތް އަވަސްކުރެއްވުމަށް އިސްލާމީކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު އެ ކުންފުނީގެ އިސްވެރިންނާ ބައްދަލުކުރައްވައި މަޝްވަރާކުރައްވައިފިއެވެ.
މި ބައްދަލުކުރެއްވުން އޮތީ އަންގާރަ ދުވަހު އިސްލާމީކަންތައްތަކާ ބެހޭ ވުޒާރާގައެވެ.
މި ބައްދަލުކުރެއްވުމުގައި މި މިސްކިތުގެ މަސައްކަތް އަވަހަށް ނިންމުމަށް ޓަކައި ކުރައްވާން ޖެހޭ ކަންކަމާ ގުޅޭ ގޮތުން ވަނީ ފުޅާ ދާއިރާއެއްގައި މަޝްވަރާކުރައްވައިފައެވެ. އަދި ވީ އެންމެ އަވަހަށް މި މިސްކިތުގެ މަސައްކަތް މުޅީން ނިންމައި ހަވާލުކުރުމަށް ޓަކައި ކުރާންޖެހޭ މަސައްކަތްތައް ވަރަށް ހަލުވިކަމާ އެކު، ކުރާނެކަމުގެ ޔަޤީންކަން އެ ކުންފުނިން ވަނީ މި ބައްދަލުކުރެއްވުމުގައި ދީފައެވެ.
އެސް.ޖޭ ކޮންސްޓްރަކްޝަނުން މިހާރު އަމާޒުހިފައިފައިވަނީ މި އަހަރުގެ ނިޔަލަށް މިސްކިތުގެ މަސައްކަތް މުޅީން ނިންމައި ހަވާލުކުރުމަށްކަމަށް އެ ކުންފުނީން ވަނީ މި ބައްދަލުވުމުގައި މަޢުލޫމާތުދީފައެވެ.
ހުޅުމާލޭ ދެވަނަ ފިޔަވަހީގައި އިމާރާތްކުރަމުން ގެންދާ މި މިސްކިތުގައި އެއްފަހަރާ 1400 މީހުންނަށް ނަމާދު ކުރެވޭނެއެވެ.