މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އަށް 2024 ވަނަ އަހަރު ކުންފުނީގެ ތާރީޚުގައި މިހާތަނަށް ލިބުނު އެންމެ ބޮޑު ސާފު ފައިދާ ކަމަށްވާ 1.1 ބިލިއަން ރުފިޔާ ލިބިފައިވާ ކަމަށް އެ ކުންފުނިން ހާމަކޮށްފިއެވެ.
މިކަން ހާމަކޮށްފައިވަނީ މިއަދު ހުޅުލޭ އައިލެންޑް ހޮޓަލުގައި ބޭއްވި އެ ކުންފުނީގެ އަހަރީ އާންމު ޖަލްސާގައެވެ. ޖަލްސާގައި ހާމަކުރި ތަފާސްހިސާބުތަކުން ދައްކާގޮތުގައި، މިއީ 2023 ވަނަ އަހަރާ އަޅާބަލާއިރު 32.2 ޕަސެންޓުގެ ކުރިއެރުމެކެވެ.
އެމްއޭސީއެލްގެ މާލީ ހިސާބުތަކުން ދައްކާ ގޮތުގައި، މިދިޔަ އަހަރު ރިކަރަންޓް ޚަރަދުގެ ގޮތުގައި 7.2 ބިލިއަން ރުފިޔާ ހޭދަކުރި ނަމަވެސް، ކުންފުންޏަށް ވަނީ ރެކޯޑް އަދަދެއްގެ ސާފު ފައިދާ ލިބިފައެވެ. މިއީ ކުންފުނީގެ ތާރީޚުގައިވެސް މިހާ ބޮޑު ސާފު ފައިދާއެއް ލިބުނު ފުރަތަމަ ފަހަރެވެ.
އެމްއޭސީއެލްއިން މިވަގުތު އެންމެ އިސްކަމެއް ދީގެން ކުރިއަށްގެންދާ މަޝްރޫޢަކީ އާ ޕެސެންޖަރ ޓާމިނަލް ހުޅުވުމުގެ މަސައްކަތެވެ. މި މަޝްރޫޢުގެ ދަށުން، އެއަރޕޯޓުގެ ޚިދުމަތްތައް އިތުރަށް ފުޅާކޮށް، އިތުރު ހަރުފަތަކަށް ގެންދިއުމަށްޓަކައި ގިނަ އުމްރާނީ ވަސީލަތްތަކެއް ވަނީ ޤާއިމްކުރެވިފައެވެ.
އެމްއޭސީއެލްއިން ބުނާ ގޮތުގައި، ކުންފުނިން އަބަދުވެސް އިސްކަންދެނީ ފަސިންޖަރުންނާއި އެއަރލައިންތަކާއި ސްޓޭކް ހޯލްޑަރުންނަށް ފުރިހަމަ ޚިދުމަތްތަކެއް ފޯރުކޮށްދިނުމަށެވެ. އަދި މި މަޤްޞަދު ހާސިލުކުރުމަށް ކުންފުނިން މަސައްކަތް ކުރަމުންދާނެ ކަމަށް ވެސް ބުނެފައިވެއެވެ.