ބޭންކް އޮފް މޯލްޑިވްސް (ބީއެމްއެލް) އިން މިއަދު ވަނީ އެ ބޭންކުގެ ޑެބިޓް ކާޑުތަކުން ރާއްޖޭން ބޭރުގެ ބައެއް އޮންލައިން ޝޮޕިންގ ސައިޓުތަކަށް ފައިސާ ދައްކާނަމަ 30 ޕަސެންޓުގެ ފީއެއް ނެގުމަށް ނިންމައިފައެވެ. މި ނިންމުން ނިންމާފައިވަނީ ޑެބިޓް ކާޑުތަކުން ޑޮލަރުގެ މުއާމަލާތް ކުރެވޭ ލިމިޓު ދެގުނަ ބޮޑުކުރުމާއެކުގައެވެ.
ބޭންކުން މައުލޫމާތު ދީފައިވާ ގޮތުގައި މި ފީ ނަގަން ނިންމާފައިވަނީ ޓީމޫ، ޝެއިން، އަލިބާބާ، އަލި އެކްސްޕްރެސް، ލަޒާޑާ އަދި އީބޭ ފަދަ އޮންލައިން ޝޮޕިންގ ސައިޓުތަކުންނެވެ. ނަމަވެސް ޓިކެޓް ނެގުމަށާއި ހޮޓާ ބުކް ކުރުމާއި ސަބްސްކްރިޕްޝަން ފަދަ އާންމު ބޭނުންތަކަށް ފައިސާގެ މުއާމަލާތްކުރާ ސައިޓުތަކުން މި ފީ ނުނަގާނެ ކަމަށް ބޭންކުން ވަނީ ހާމަކޮށްފައެވެ.
ބޭންކުން މި ބަދަލުތައް ގެނައުމާއެކު:
ޑޮލަރު އެކައުންޓުތަކަށް ދޫކޮށްފައިވާ ޑެބިޓް ކާޑުތަކާއި ކްރެޑިޓް ކާޑުތަކުން މި ފީ ނުނެގޭނެއެވެ.
ރާއްޖޭން ބޭރުގައި އޭޓީއެމް އިން ނަގުދު ފައިސާ ނެގޭނެ އަދަދު މަހަކު 125 ޑޮލަރަށް ވަނީ ކުޑަކޮށްފައެވެ. އަދި އޭޓީއެމް އިން ފައިސާ ނެގުމުން 10 ޑޮލަރުގެ ޗާޖެއް ނެގޭނެއެވެ.
ރާއްޖޭން ބޭރުން މުދަލާއި ޚިދުމަތަށް ފައިސާ ދެއްކޭނެ އަދަދު 500 ޑޮލަރަށް ވަނީ އިތުރުކޮށްފައެވެ.
“އެންމެ އިސްކަންދެނީ ރާއްޖޭން ބޭރުން ޑެބިޓް ކާޑުން ކުރެވޭ މުއާމަލާތްތަކުގައި އާންމުންގެ ޒަރޫރީ ބޭނުންތަކަށް ރަނގަޅު ހައްލެއް ހޯދާ ދިނުމަށް،” ބޭންކުން ހާމަކުރިއެވެ.
މި ބަދަލުތަކާއެކު، މާދަމާއިން ފެށިގެން ޑެބިޓް ކާޑުތަކާއި ކްރެޑިޓް ކާޑުތަކަށް މަހަކަށް ކަނޑައެޅޭ ލިމިޓް ބަލަން ފަށާނީ ކޮންމެ މަހެއްގެ ފުރަތަމަ ދުވަހުން ފެށިގެންނެވެ.