ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މިއަދު ސިންގަޕޫރުގެ ރައީސް ތަރްމަން ޝަންމުގަރަނަމްގެ އަރިހަށް އިޙްތިރާމްގެ ޒިޔާރަތެއް ކުރައްވައިފިއެވެ. މި ޒިޔާރަތަކީ ދިވެހިރާއްޖެއާއި ސިންގަޕޫރާ ދެމެދު ސިޔާސީ ގުޅުން ޤާއިމުކުރި ތާ 50 އަހަރު ފުރުމާ ގުޅިގެން ކުރެއްވި ޒިޔާރަތެކެވެ.
މި ބައްދަލުކުރެއްވުމުގައި ރައީސް ޝަންމުގަރަނަމް ވަނީ، ދެ ޤައުމުގެ ދެމެދުގައި ސިޔާސީ ގުޅުން ގާއިމުވުމުގެ ރަންޔޫބީލާއި ދިމާކޮށް ރައީސް މުޢިއްޒު ސިންގަޕޫރަށް ކުރައްވާ ދަތުރުފުޅާމެދު އުފާފާޅުކުރައްވާފައެވެ. އަދި ރައީސް މުޢިއްޒު ވަނީ ސިންގަޕޫރުން ދެއްވި ހޫނު މަރުޙަބާއާއި މެހެމާންދާރީއަށް ޝުކުރު އަދާކުރައްވާފައެވެ.
ދެ ޤައުމުގެ އެންމެ އިސްވެރިންގެ މި ބައްދަލުކުރެއްވުމުގައި، ފާއިތުވި 50 އަހަރުގެ ސިޔާސީ ގުޅުމުގެ މައްޗަށް ނަޒަރު ހިންގަވައި، އެ ގުޅުން އިތުރަށް ހަރުދަނާކުރުމުގެ އަޒުމް ވަނީ ފާޅުކުރައްވާފައެވެ. އަދި ދެ ޤައުމުގެ ރައްޔިތުންގެ މެދުގައި އޮތް ދެމެހެއްޓެނިވި ގާތް ގުޅުން ފާހަގަކުރައްވައި، ތަމްރީނާއި ތަޢުލީމު، އިއާދަކުރަނިވި ހަކަތަ އަދި ޢުމްރާނީ ތަރައްޤީގެ ދާއިރާތަކުން އެއްބާރުލުން އިތުރުކުރުމާ ބެހޭގޮތުން މަޝްވަރާކުރެއްވިއެވެ.
މި ބައްދަލުކުރެއްވުމުގައި ދިވެހިރާއްޖޭގެ މަސްވެރިކަމުގެ ދާއިރާ ތަރައްޤީކުރުމާއި، ފަތުރުވެރިކަމުގެ އިތުރުން އެހެނިހެން ދާއިރާތަކުން އިޤްތިޞާދު ފުޅާކުރުމުގެ މަސައްކަތްތަކާ ބެހޭގޮތުންވެސް މަޝްވަރާކުރެއްވިއެވެ.
ބައްދަލުކުރެއްވުމުގެ ނިމުމުގައި، ރައީސް މުޢިއްޒު ވަނީ 1975 ވަނަ އަހަރުގެ ފެބްރުއަރީ 20 ގައި ދެ ޤައުމުގެ ދެމެދުގައި ސިޔާސީ ގުޅުން ޤާއިމުކުރި ފަހުން ފާއިތުވި 50 އަހަރުގެ ތެރޭގައި ހިނގާފައިވާ މުހިންމު ކަންކަމާއި ހާސިލުކުރެވުނު ކުރިއެރުންތައް ހިމެނޭ ހަނދާނީ ފޮތެއް ރައީސް ޝަންމުގަރަނަމްއަށް ހަދިޔާކުރައްވާފައެވެ.